2026-yil birinchi yarim yillikda O‘zbekistonga pul o‘tkazmalari hajmi 9,3 mlrd AQSh dollarini tashkil etdi va o‘tgan yilning mos davriga nisbatan 13 foizga oshdi. Bu haqda Markaziy bankning jismoniy shaxslarning valyuta operatsiyalari sharhida so‘z boradi.
Hisobot davrida eng ko‘p o‘tkazmalar iyun oyida qayd etilgan - 2,2 mlrd dollar.
«O‘zbekistonga kelib tushgan pul o‘tkazmalari hajmining o‘sishiga mehnat muhojirlari ishlaydigan an’anaviy mamlakatlarda ishchi kuchiga talab va ish haqlarining nisbatan yuqori darajada saqlanib qolishi bilan bir qatorda, milliy valyuta kurslarining yil boshiga nisbatan mo‘’tadil tebranuvchanligiga qaramasdan, umumiy mustahkamlanishi ta’sir qildi», deyiladi MB sharhida.
Regulyator mehnat migratsiyasi geografiyasining diversifikatsiyalashuvi davom etayotganini, bu esa rivojlangan mamlakatlardan kelayotgan pul o‘tkazmalari oqimida ham o‘z aksini topayotganini qayd etgan.
Xususan, 2026-yilning yanvar-iyun oylarida pul o‘tkazmalari Buyuk Britaniyadan 62 foizga, Yevropa Ittifoqi mamlakatlaridan - 27 foizga (Irlandiya 86 foiz, Litva 18 foiz, Niderlandiya 7 foiz), AQShdan esa 19 foizga o‘sgan. Bu ko‘rsatkich mamlakatlar kesimida quyidagicha o‘zgargan:
- Qozog‘istondan - 366 mln dollardan 469 mln dollargacha;
- AQShdan - 313 mln dollardan 372 mln dollargacha;
- Janubiy Koreyadan - 282 mln dollardan 314 mln dollargacha;
- Turkiyadan - 266 mln dollardan 303 mln dollargacha;
- Buyuk Britaniyadan - 89 mln dollardan 144 mln dollargacha;
- Yevropa Ittifoqi mamlakatlaridan - 251 mln dollardan 319 mln dollargacha.
Hisobot davrida jismoniy shaxslarga kelib tushgan mablag‘larning 4,3 mlrd dollari (46,7 foizi) an’anaviy xalqaro pul o‘tkazma tizimlari orqali (2025-yilning mos davriga nisbatan o‘sish 0,3 foiz), 4,8 mlrd dollari (51,7 foizi) xorijdan jismoniy shaxslarning bank kartalariga to‘g‘ridan to‘g‘ri – P2P o‘tkazmalar orqali (o‘sish 32 foiz) hamda 142 mln dollari (1,6 foizi) bank o‘tkazmasi – SWIFT orqali (kamayish 43 foiz) amalga oshirilgan.
