Qurilish va uy-joy kommunal xo‘jaligi vazirining buyrug‘i bilan Ko‘p kvartirali uylarni saqlash va ulardan foydalanish qoidalariga o‘zgartish va qo‘shimchalar kiritildi. Hujjat 2026-yil 14-avgustda Adliya vazirligida 3824-1-son bilan davlat ro‘yxatidan o‘tkazilgan.
Yangi talablarga ko‘ra, ko‘p kvartirali uyni boshqarish organi liftlarning butun foydalanish muddati davomida avariyasiz va xavfsiz ishlashini ta’minlashi kerak. Texnik xizmat ko‘rsatish va ta’mirlash uchun lift to‘xtatib qo‘yilgan vaqt bundan mustasno.
Shuningdek, boshqarish organi liftlar faoliyati ustidan dispetcherlik nazoratini yo‘lga qo‘yishi shart. Liftdagi avariya-qutqaruv qurilmasi, kuzatuv kamerasi, aloqani kuchaytirish qurilmasi va avariya holatlari haqida xabar berish vositalari soz holatda saqlanishi lozim.
Lift kabinasi va mashina xonasidan operator bilan ikki tomonlama aloqa qilish imkonini beruvchi chiroqli va tovushli signalizatsiya hamda aloqa vositalari ham ishchi holatda bo‘lishi talab etiladi.
Bundan tashqari, liftga har oy texnik xizmat ko‘rsatilishi va yiliga bir marta davriy texnik ko‘rik o‘tkazilishi ta’minlanadi. Avariya, nosozlik yoki boshqa xavfli holatlar aniqlansa, liftga texnik xizmat ko‘rsatuvchi tashkilotga darhol xabar berilishi kerak.
Lift kabinasida undan foydalanish qoidalari, liftning nomi va yuk ko‘tarish qobiliyati, ruxsat etilgan yo‘lovchilar soni ko‘rsatilgan lavha bo‘lishi shart. Shuningdek, unda «Xavfsiz lift» elektron platformasidagi qayd raqami, davriy texnik ko‘rikdan o‘tgani haqida ma’lumot hamda texnik xizmat ko‘rsatuvchi tashkilot yoki avariya xizmati bilan bog‘lanish uchun telefon raqami joylashtiriladi.
Yangi qoidalarni nazarda tutuvchi buyruq rasmiy e’lon qilingan kundan e’tiboran uch oy o‘tgach kuchga kiradi.
