Toshkentda taksi haydovchisi va yo‘lovchi o‘rtasidagi mojaro kattalashib, haydovchi shifoxonaga yotqizilgan edi. Holat yuzasidan qo‘zg‘atilgan jinoyat ishi doirasida haydovchiga kuch ishlatgan bloger qamoqqa olindi.
Bu haqda Toshkent shahar Ichki ishlar bosh boshqarmasi Axborot-multimedia markazi boshlig‘i o‘rinbosari Qahramon Xudoyberganov Kun.uz'ga ma’lum qildi.
Uning aytishicha, bloger Toshkent shahar Ichki ishlar bosh boshqarmasi Tergov boshqarmasi tomonidan qo‘zg‘atilgan jinoyat ishi doirasida qamoqqa olingan.
Gap 17-avgust kuni Toshkentning Yashnobod tumanida sodir bo‘lgan mojaro haqida ketmoqda. Unda 27 yoshli taksi haydovchisi Yoqubbek Jo‘raboyev va yo‘lovchi ayol o‘rtasida og‘zaki tortishuv chiqqan. Keyin voqea joyiga yo‘lovchining ikki tanishi bo‘lgan instablogerlar yetib kelib, haydovchi bilan janjallashgan, unga nisbatan haqoratli so‘zlar ishlatib tahqirlashgan. Ular avvaliga haydovchini ayolga jinsiy tegajog‘likda ayblab video qo‘yishgan. Vaziyat o‘zgargach, blogerlar videomurojaat orqali jamoatchilikdan o‘zlarini oqlashda yordam so‘ray boshlagan. Shundan so‘ng ularning sahifalaridan holat bilan bog‘liq barcha videolar o‘chirilgan.
Haydovchi voqea vaqtida unga kuch ishlatilganini aytgan va tan jarohatlari bilan shifoxonaga yotqizilgan. Shifokorlar uning peshona va ensa sohalarida shishlar, shuningdek, yelka, yonbosh, ko‘krak va qorin sohalarida shilingan jarohatlar aniqlanganini ma’lum qilgan.
