20-avgustga o‘tar kechasi Rossiya qo‘shinlari Kiyevga ballistik raketalar bilan zarba berdi. Kiyev shahar harbiy ma’muriyati ma’lumotlariga ko‘ra, hujum oqibatida kamida besh kishi halok bo‘lgan va 23 kishi turli darajada jarohatlangan.
Avvalroq Kiyev meri Vitaliy Klichko uch kishi halok bo‘lgani va 20 kishi jabrlangani haqida xabar bergan edi. Uning ma’lum qilishicha, jabrlanganlarning 14 nafari shifoxonaga yotqizilgan, qolganlarga ambulator sharoitda yoki hodisa joyining o‘zida tibbiy yordam ko‘rsatilgan.
Kiyevning Solomenskiy tumanida raketa parchalari besh qavatli turar joy binosi yaqiniga tushgan. Binoning derazalari singan va hududda yong‘in kelib chiqqan.
Shuningdek, to‘qqiz qavatli turar joy binosi ham zarbadan zarar ko‘rgan. Klichkoning so‘zlariga ko‘ra, uyning yuqori qavatlari vayron bo‘lgan.
Yana bir manzilda odamlar boshpanada qamalib qolgani xabar qilindi. Qutqaruvchilar ularga yordam ko‘rsatish ishlarini olib borgan.
Solomenskiy tumanidagi bolalar shifoxonasi binosi ham shikastlangan. Tibbiyot muassasasi hududida bir nechta avtomobil yonib ketgan.
Kiyevning Darnitskiy va Svyatoshinskiy tumanlarida esa noturar joy binolarida yong‘inlar qayd etilgan.
Ukraina Telegram-kanallari Kiyev viloyatining Brovari shahridagi omborlarga ham zarba berilgani haqida xabar tarqatmoqda. Bu ma’lumotlar bo‘yicha rasmiy tafsilotlar hozircha keltirilmagan.
