Tojikistonda Turizmni rivojlantirish fondi tashkil etildi va uni moliyalashtirish manbalaridan biri fuqarolardan undiriladigan turizm soligʻi boʻladi. Bu haqda Asia Plus xabar berdi.
Joriy yilning 1-iyul kuni hukumat fondni tashkil etish va uning faoliyatini tartibga solish toʻgʻrisidagi qarorni imzolagan. Fond mablagʻlari uchun Moliya vazirligi Markaziy gʻaznachilik bosh boshqarmasida maxsus hisob raqami ochiladi. Mablagʻlar fond kengashi qarorlari asosida sarflanadi.
Yangi mexanizmning muhokamalarga sabab boʻlayotgan jihati shundaki, fondni moliyalashtirish manbalari qatoriga mahalliy va xorijiy sayyohlardan olinadigan turli yigʻimlar bor. Xususan, Tojikiston fuqarolaridan chet elga sayohat qilish uchun sotib olgan turistik paketlari qiymatining 5 foizi miqdorida pul undirish koʻzda tutilapti. Bundan tashqari, fondga xorijiy turistlarning mamlakatdagi har bir sutkalik sayohati uchun turistik paketlaridan olinadigan yigʻim, turistik xizmatlar koʻrsatishga ruxsat beruvchi hujjat uchun yigʻim, ushbu yigʻimlarni toʻlashdan boʻyin tovlaganlik uchun jarimalar, depozitlardan daromadlar, shuningdek, xalqaro moliya tashkilotlarining grantlari va maqsadli mablagʻi kelib tushadi.
