Kolumbiya prezidenti Abelardo de la Esprielya mamlakatda sodir bo‘lgan 7,4 magnitudali kuchli zilziladan so‘ng umummilliy favqulodda holat e’lon qildi. U bu haqda 10-avgust kuni, prezidentlik lavozimiga kirishganidan uch kun o‘tib ma’lum qildi.
Davlat rahbarining ta’kidlashicha, tabiiy ofat oqibatlariga qarshi kurashish uchun mamlakatdagi barcha institutsional resurslar safarbar etiladi.
«Birinchi navbatda vayronalar ostida qolgan odamlarni qutqarish kerak», - deya prezident so‘zlarini keltirgan dpa agentligi.
Kolumbiya mintaqaviy markazlari assotsiatsiyasi ma’lumotlariga ko‘ra, zilzila oqibatida kamida 132 kishi halok bo‘lgan, yana 570 kishi turli darajada jarohatlangan.
Tabiiy ofat bir qator shaharlarda katta vayronagarchiliklarga sabab bo‘ldi. Jumladan, Pereyra, Kali va Manisales shaharlarida 1500 dan ortiq turar joy jiddiy zarar ko‘rgan.
Taxminan 60 ta bino to‘liq qulab tushgan. Shuningdek, 18 ta shifoxona va 52 ta maktab binosiga zarar yetgan. Qutqaruv ishlari davom etayotgani bois qurbonlar soni yana ortishi mumkinligidan xavotir bildirilmoqda.
XXI asrda Kolumbiyada qayd etilgan eng kuchli zilzila
Zilzila 10-avgust kuni mahalliy vaqt bilan soat 07:34 da sodir bo‘lgan.
Kolumbiya geologiya xizmati (SGC) ma’lumotiga ko‘ra, zilzila o‘chog‘i mamlakat g‘arbidagi San-Xose-del-Palmar shahri yaqinida, taxminan 103 kilometr chuqurlikda joylashgan.
Asosiy silkinishdan keyin ko‘plab aftershoklar ham qayd etilgan.
Kolumbiya geologiya xizmati mazkur zilzilani XXI asrda mamlakat hududida qayd etilgan eng kuchli zilzila deb atagan.
AQSh 15,5 million dollar yordam ajratadi
AQSh Davlat departamenti 10-avgust kuni zilzila oqibatlarini bartaraf etish uchun Kolumbiyaga 15,5 million dollarlik shoshilinch yordam paketi ajratilishini ma’lum qildi.
Amerika tashqi siyosat idorasi Kolumbiya xalqi bilan birdamligini bildirib, mamlakat hukumatiga tabiiy ofat oqibatlarini bartaraf etishda ko‘mak berishga tayyorligini qayd etgan.
Yangi prezident uchun dastlabki jiddiy sinov
Abelardo de la Esprielya 2026-yil iyunida bo‘lib o‘tgan prezidentlik saylovining ikkinchi bosqichida Ivan Sepeda ustidan g‘alaba qozongan edi.
U ikkinchi muddatga nomzodini qo‘ya olmagan Gustavo Petro o‘rnini egalladi.
De la Esprielya saylovoldi kampaniyasi davomida narkotiklar savdosiga aloqador qurolli guruhlarga qarshi harbiy kuchlardan foydalanish, iqtisodiyotda tartibga solishni qisqartirish va jinoyatchilikka qarshi kurash choralarini kuchaytirishni va’da qilgan.
Shuningdek, u jinoyatchilikka qarshi kurash doirasida Salvador tajribasiga o‘xshash yirik qamoqxonalar qurish rejasini ilgari surgan.
AQSh davlat kotibi Marko Rubio de la Esprielya saylanganidan so‘ng Vashington yangi ma’muriyat bilan mintaqaviy xavfsizlik, AQShga noqonuniy migratsiyaning oldini olish va ikki davlat o‘rtasidagi iqtisodiy aloqalarni mustahkamlash yo‘nalishlarida yaqin hamkorlik qilishdan manfaatdor ekanini bildirgan.
