2-sentabr kuni oʻtkazilgan ochilish marosimida Prezident Administratsiyasi rahbari Saida Mirziyoyeva hamda Qatar muzeylari kengashi raisi Shayxa Al-Mayassa bint Hamad bin Xalifa Ol Soniy qatnashdi.
Taʼkidlanishicha, ushbu ekspozitsiyada Oʻzbekiston muzeylari hamda Qatar kolleksiyalaridan oʻrin olgan noyob eksponatlar jamlangan. Xususan, ular orasida Islom dini tarqalishidan avvalgi asrlar va Somoniylar, Temuriylar davlaridan to bugungi kungacha boʻlgan tarixiy bosqichlarni qamrab olgan nodir osori-atiqalar, anʼanaviy hunarmandchilik va toʻqimachilik sanʼati namunalari bor.
“Bu - Qatar xalqi va uning mehmonlarini boy tariximiz hamda merosimiz bilan yaqindan tanishtirish uchun qulay imkoniyat, shuningdek, Oʻzbekiston-Qatar madaniy aloqalarini yanada rivojlantirish yoʻlidagi muhim qadamdir”, - deya yozdi Saida Mirziyoyeva.
Qayd etilishicha, mazkur muzeyda 7 nafar hunarmandning Toshkent, Samarqand va Buxoro boʻylab ijodiy safari yakunlariga bagʻishlangan “Ektashif Oʻzbekiston” koʻrgazmasi ham oʻz ishini boshlagan.
Unda Oʻzbekistonning boy madaniyati, anʼanalaridan ilhomlangan ustalar tomonidan yaratilgan nozik zargarlik buyumlari, xattotlik sanʼati namunalari, nafis gilamlar hamda safar taassurotlarini aks ettiruvchi fotosuratlar jamlanmasi namoyish etilmoqda.
