7-sentabrdan Parkent-Toshkent-Parkent yoʻnalishida shaharlararo elektropoyezd qatnovi yoʻlga qoʻyildi. Bu haqda “Oʻzbekiston temir yoʻllari” AJ matbuot xizmati xabar berdi.
Maʼlum qilinishicha, 2025-yil yanvar oyida boshlangan “Baytqoʻrgʻon – Parkent” temiryoʻl liniyasi qurilishi yakunlangan. Loyiha doirasida uzunligi 24 km boʻlgan elektrlashtirilgan temiryoʻl, 3 dona temir-beton koʻprik, 1 dona avtomobil yoʻl oʻtkazgich, 76 dona suv oʻtkazish inshooti hamda 16 dona avtomobil yoʻli va temiryoʻli kesishmasi barpo etilgan. Shuningdek, 50 oʻrinli “Parkent” temiryoʻl bekati qurilgan.
Elektropoyezdda 586 ta oʻrin boʻlib, 1154 tagacha yoʻlovchi tashish imkoni bor.
Chiptalar narxi kattalar uchun 10 ming soʻmgacha, 10 yoshgacha boʻlgan bolalarga 6,5 ming soʻm qilib belgilangan. Yoʻlovchilar manzilga 50 daqiqada yetib borishlari mumkin.
Mazkur yirik loyiha Parkent tumanining turistik salohiyatini oshirishga ham xizmat qilishi kutilmoqda.
