Xorazm viloyatida Urganch xalqaro aeroporti va Xiva vokzali oʻrtasida elektropoyezd qatnovi yoʻlga qoʻyildi.
“Oʻzbekiston temir yoʻllari” xabariga koʻra, bu yoʻnalishda yoʻlovchilarga Xitoyda ishlab chiqarilgan tezyurar elektropoyezd xizmat koʻrsatadi. Qatnov – kuniga bir marta.
Poyezd Urganch aerovokzalidan soat 8:40 da joʻnab ketadi, 08:59–09:02 oraligʻida Urganch vokzalida boʻladi, Xivaga soat 09:22 da yetib boradi.
Ortga qaytishda esa soat 21:00 da Xivadan joʻnaydi, 21:20–21:23 oraligʻida Urganch vokzalida boʻladi va 21:42 da Urganch aerovokzaliga yetib boradi.
Chipta narxlari – kattalar uchun 25 ming soʻm, bolalar uchun 14 ming soʻm.
Chiptalarni ticket.eletropoyezd.uz sayti orqali sotib olish mumkin. Maʼlumot uchun 1005 qisqa raqamiga qoʻngʻiroq qilish mumkin.
CR200J rusumli poyezd Xitoyning CCRC Dalian Co. Ltd. kompaniyasi tomonidan ishlab chiqarilgan.
“Mazkur elektropoyezd 6 ta vagondan iborat boʻlib, 415 nafar yoʻlovchiga moʻljallangan. Poyezdning harakat tezligi 160 km/soatni tashkil etadi.
Elektropoyezdda yoʻlovchilar uchun “Ekonom” toifasidagi zamonaviy va qulay oʻrindiqlar, har bir oʻrindiqda USB quvvatlantirish qurilmalari, vagon ichidagi iqlimni meyorida saqlash imkonini beruvchi iqlim nazorati tizimi mavjud. Shuningdek, nogironligi boʻlgan yoʻlovchilar uchun maxsus joylar koʻzda tutilgan”, – deyiladi xabarda.
Eslatib oʻtamiz, bu loyiha uchun Urganch aeroportini Urganch vokzali bilan bogʻlovchi 11 kilometrlik yangi temiryoʻl liniyasi qurildi. 17-avgust kuni prezident Shavkat Mirziyoyev bu yangi liniya bilan tanishgan edi. Rasmiylarga koʻra, bu – Oʻzbekiston uchun aeroportga temiryoʻl olib kelish bilan bogʻliq birinchi loyiha hisoblanadi.
