Yevropa Ittifoqi Grenlandiyaga investitsiyalarni sezilarli darajada koʻpaytirish niyatida. Yevropa komissiyasi raisi Ursula fon der Lyayen 7-sentabr kuni Daniya tarkibidagi avtonom hududga tashrifi chogʻida yangi investitsiya rejalarini taqdim etishi kutilmoqda.
Moliyalashtirish, jumladan, muhim minerallarni qazib olish va qayta ishlash, sunʼiy yoʻldosh aloqasini rivojlantirish hamda qayta tiklanadigan energetika sohalariga yoʻnaltiriladi.
Fon der Lyayen 6-sentabr kuni Grenlandiya maʼmuriy markazi Nuuk shahrida yangi moliyaviy paket «sezilarli hajmda» boʻlishini maʼlum qildi.
Grenlandiya bosh vaziri Yens-Frederik Nilsen esa avtonom hudud Yevropa Ittifoqi bilan yaqin doʻstlik munosabatlari va mustahkam sheriklikni rivojlantirishni istashini bildirdi.
Yevropa komissiyasi raisi Grenlandiyaga ikki kunlik tashrif bilan kelgan. Tashrifdan koʻzlangan maqsadlardan biri Grenlandiya va Daniya hukumatlarini qoʻllab-quvvatlash ekani aytilmoqda.
Arktikaning geosiyosiy ahamiyati oshib bormoqda
Grenlandiya atrofidagi jarayonlar Arktikaning jahon siyosati va iqtisodiyotidagi ahamiyati ortib borayotgan bir paytga toʻgʻri kelmoqda.
Muzliklarning erishi mintaqadagi tabiiy resurslardan foydalanish imkoniyatlarini kengaytirmoqda. Shu bilan birga, yangi dengiz yoʻllarining paydo boʻlishi Arktikaning transport va harbiy-strategik ahamiyatini ham oshirmoqda.
Ayniqsa, Grenlandiyadagi muhim minerallar zaxiralari yirik davlatlar eʼtiborini tortmoqda. Shu sababli orol iqtisodiy manfaatlar bilan bir qatorda geosiyosiy raqobat nuqtalaridan biriga aylanib bormoqda.
AQSH prezidenti Donald Tramp joriy yilda AQSH Grenlandiya ustidan nazorat oʻrnatishi kerakligini bir necha bor taʼkidladi. U Daniya Grenlandiya xavfsizligini yetarli darajada taʼminlay olmasligini iddao qilgan.
Kopengagen va Nuuk hukumatlari esa AQSH prezidentining bunday talablarini qatʼiy rad etgan.
Iyul oyida Turkiyada oʻtkazilgan NATO sammitida Tramp Grenlandiyaga nisbatan oʻz pozitsiyasini yana bir bor tasdiqlagan.
YEI Grenlandiyada moliyalashtirish yoʻnalishlarini kengaytiradi
Grenlandiya 1985-yilda Yevropa hamjamiyatidan chiqqan. Shunga qaramay, Yevropa Ittifoqi uzoq yillardan buyon avtonom hududga moliyaviy yordam koʻrsatib keladi.
