21-sentabr kuni Samarqandda 46-Butunjahon shaxmat Olimpiadasining 6-turi oʻtkazildi.
Oʻzbekistonning birinchi raqamli erkaklar jamoasi amaldagi chempionlar, bu safargi turnirda ham gʻoliblikka asosiy daʼvogarlardan biri sanalgan Hindiston vakilariga qarshi dona surdi.
6-tur arafasida ikki jamoa ham 5 tadan gʻalabaga erishgan holda 10 tadan ochko jamgʻargandi, Oʻzbekiston-1 jamoasi faqat qoʻshimcha koʻrsatkichlar hisobiga birinchi oʻrinda joylashgandi. Ushbu bellashuv taqdiri amalda turnir gʻolibi masalasini hal qilishi kutilayotgandi.
Oʻzaro bahs kutilganidek shiddatli kechdi va dramatik yakun topdi. Avvaliga Javohir Sindarov qiyin vaziyatda qolganiga qaramay, Arjun Erigaisi bilan durang qayd etishning uddasidan chiqdi.
Nodirbek Abdusattorov Rameshbabu Praggnandha bilan bahsda murosa koʻchasini tanladi. Shamsiddin Vohidov esa amaldagi jahon chempioni Gukesh Dommaraju bilan ochkoni teng boʻlishib oldi.
Shundan keyin barchaning eʼtibori Nodirbek Yoqubboyev va Nihal Sarin oʻrtasida bahs ketayotgan doskaga qaratildi. Bu bahsda avvaliga hindistonlik shaxmatchi pozitsiya boʻyicha ham, vaqt boʻyicha ham katta ustunlikka ega edi, ammo kutilmaganda ketma-ket xatolarga yoʻl qoʻydi, farzinni oldirgach esa taslim boʻldi.
Shu tariqa, ikki favorit jamoa oʻrtasidagi bahs mezbonlarning 2,5-1,5 hisobidagi ustunligi bilan yakunlandi.
Oʻzbekiston-1 jamoasi turnir davomida Yamayka (4:0), Peru (3,5-1,5), Avstriya (3,5-1,5), Turkiya (2,5-1,5) va Vengriya (4:0) kabi jamoalar ustidan gʻalaba qozongandi.
6-turdan keyin Oʻzbekiston-1 jamoasi ochkolari sonini 12 taga yetkazgan holda birinchi oʻrinni mustahkamladi. Hindiston esa 10 ochkosi bilan qoldi va kuchli uchlikni tark etdi. Bu turda Germaniyani magʻlub etgan Xitoy hamda Erondan ustun kelgan Armaniston 11 tadan ochko bilan ikkinchi va uchinchi oʻrinlarni boʻlishib turibdi.
Maʼlumot uchun, soʻnggi uch Olimpiada davomida Oʻzbekiston va Hindiston toʻrt marta toʻqnashgan. Oldingi uchta oʻzaro bahsda durang qayd etilgandi, Samarqanddagi gʻalaba esa Oʻzbekiston uchun oʻzaro uchrashuvlardagi ilk gʻalaba boʻldi.
Oʻzbekiston-2 jamoasi (Jahongir Vohidov, Abdumalik Abdusalimov, Muhammadzohid Suyarov, Humoyun Begmuratov) ham bu turda Ispaniya ustidan gʻalaba qozondi (2,5-1,5) va ochkolari sonini 10 taga yetkazib, umumiy reytingda 10-oʻringa koʻtarildi. Hindiston, Fransiya, Niderlandiya, Angliya, Germaniya va Ozarboyjonda ham 10 tadan ochko bor, ammo bu jamoalar qoʻshimcha koʻrsatkichlar evaziga yuqoriroqda joylashgan.
