Reyting yetakchilari
Xalqaro shaxmat federatsiyasi (FIDE) reytingida norvegiyalik Magnus Karlsen 2823 ochko bilan birinchi oʻrinni egallab turibdi. Ikkinchi oʻrinda 2792 ochko bilan amerikalik Hikaru Nakamura bormoqda. Oktabr oyidagi rasmiy reytingda uchinchi oʻrinni yana bir amerikalik Fabiano Karuana (2784) band etgan, uning koʻrsatkichi sentabr oyiga nisbatan 5 punktga pasaydi. Keyingi oʻrinlardan Sindarov (2782) va Abdusattorov (2780) joy olgan.
Yil davomida ikkinchi marta
Tarixda ilk bor 2026-yil aprel oyida birdaniga ikki nafar oʻzbekistonlik shaxmatchi kuchli beshlikka kirgan edi. Oʻshanda Abdusattorov 2780 ochko bilan toʻrtinchi boʻlgan, Kiprdagi daʼvogarlar turnirida gʻolib chiqqan Sindarov esa olti pogʻona yuqorilab, 2776 ochko bilan beshinchi oʻrinni egallagandi. Iyun oyida ham ikkalasi beshlikda qoldi.
Yozda Abdusattorov kuchli beshlikdan chiqib ketdi: iyul oyida u oltinchi boʻldi, avgustda sakkizinchi oʻringa tushib ketdi. FIDE’ning oktabr oyidagi reytingida oʻzbekistonlik juftlik yana kuchli beshlikdan joy oldi. Sindarov 2782 ochko (+4) bilan toʻrtinchi oʻrinni saqlab qoldi, Abdusattorov esa 2780 (+18) ochko bilan beshinchi oʻringa koʻtarildi. Bunga Oʻzbekiston terma jamoasi gʻalaba qozongan Samarqanddagi Olimpiadada birinchi taxtada qoʻlga kiritilgan oltin medal yordam berdi. 2780 reytingi Abdusattorovning shaxsiy rekordini takrorlaydi.
Sindarov top-uchlikda
Javohir Sindarovni uchinchi oʻrindan ikki punkt ajratib turibdi. live-reytingda u allaqachon Karuanani ortda qoldirdi. Bu holat amerikalik shaxmatchining AQSH chempionatida Endi Vudvorddan uchragan magʻlubiyatidan keyin yuz berdi. Shu tariqa Sindarov oʻz faoliyatida va oʻzbek shaxmati tarixida ilk bor uchinchi oʻringa koʻtarildi. 1-oktabrdagi roʻyxat rasmiy boʻlib qolmoqda, keyingisi 1-noyabrda eʼlon qilinadi.
Gukesh: oʻzining eng yuqori koʻrsatkichidan 84 punkt pastda
Amaldagi jahon chempioni, hindistonlik Gukesh Dommaraju Olimpiadada 7 ochko jamgʻardi va hozir 2710 reyting bilan 28-oʻrinda bormoqda. U oʻzining eng yuqori - 2794 koʻrsatkichini 2024-yil oktabr oyida qayd etgan edi. Gukesh Olimpiadani Hindiston terma jamoasining toʻrtinchi taxtasida oʻtkazib, kumush medalni qoʻlga kiritdi. Soʻnggi turda Gleb Dudinga imkoniyatni boy berishi uni yakkalik bahslardagi oltin medaldan mahrum qildi.
