UzAuto Motors'ni xususiylashtirish ochiq va raqobat asosida amalga oshiriladi. Bunda ayrim kompaniyalarga, jumladan, Amerikaning General Motors kompaniyasiga aktivni sotib olish uchun imtiyoz yoki ustuvor huquq berilmaydi. Bu haqda Davlat aktivlarini boshqarish agentligi matbuot xizmati Spot’ga maʼlum qilgan.
Davaktiv maʼlumotiga koʻra, xususiylashtirishda milliy qonunchilik talablariga javob beradigan har qanday investor ishtirok etishi mumkin. Aktivni xalqaro savdolar orqali, jarayonning ochiqligi va shaffofligini taʼminlagan holda sotish rejalashtirilmoqda.
UzAuto Motors'ni sotishga tayyorgarlik avval tasdiqlangan xususiylashtirish dasturi doirasida allaqachon boshlangan. Davaktiv xalqaro konsultantlarni jalb qilgan, ular hozirda kompaniyada due diligence tekshiruvini oʻtkazib, sotuv uchun zarur hujjat va materiallarni yigʻmoqda.
Konsultantlarning tegishli xulosalari va takliflari olingach, agentlik aktivni sotish jarayoni boshlanganini rasman eʼlon qiladi.
Avvalroq, UzAuto Motors Chevrolet brendi ostida avtomobillar ishlab chiqaradi va texnologik jihatdan GM litsenziyalari hamda butlovchi qismlariga bogʻlangan. Shu jihatdan ehtimoliy xaridor Amerika kompaniyasi bilan birga ishlaydigan tashkilotlardan biri boʻlishi mumkinligi taxmin qilingandi.
