Naked Science nashri Visual Capitalist infografikasiga tayanib xabar berishicha, reyting OPEKning 2026-yilgi yillik statistik byulleteni maʼlumotlari asosida tuzilgan. Hisob-kitoblarga xom neft, jumladan, gaz kondensati hamda neft mahsulotlari kiritilgan.
Reytingda eksport chegirib tashlanmagan yalpi import hajmi aks ettirilgan. Shu sababli import qilingan neftning bir qismini qayta ishlab, yana xorijga sotadigan Singapur va Niderlandiya kabi davlatlar ham yuqori oʻrinlardan joy olgan.
Xitoy yetakchi, AQSH ikkinchi oʻrinda
Xitoyning 2025-yildagi neft va neft mahsulotlari importi kuniga 13,8 million barrelni tashkil etgan. Bu ikkinchi oʻrindagi AQSH koʻrsatkichidan qariyb ikki baravar koʻp. Xitoyning faqat xom neft importi esa kuniga rekord darajadagi 11,6 million barrelga yetgan.
AQSH yirik importchi boʻlishi bilan birga, katta hajmda neft va neft mahsulotlari eksport ham qiladi. 2025-yilda mamlakatning ushbu eksporti kuniga 10,7 million barrelni tashkil etgan.
Amerika neftni qayta ishlash zavodlarining koʻpchiligi dastlab ogʻir neftni qayta ishlashga moʻljallab qurilgan. Shu bois AQSH xorijdan neft sotib olishda davom etmoqda. Amerika importining qariyb 57 foizi Kanada hissasiga toʻgʻri keladi. Ayni paytda yengilroq slanets nefti va ortiqcha yonilgʻi hajmlari eksportga yoʻnaltiriladi.
Yirik importchilar beshligi
Reytingda uchinchi oʻrinni kuniga 6,2 million barrel import bilan Hindiston egallagan. Undan keyin Janubiy Koreya - 3,8 million barrel va Yaponiya - 3,3 million barrel bilan qayd etilgan.
Xitoy, AQSH, Hindiston, Janubiy Koreya va Yaponiya birgalikda jahon neft importining 46 foizini tashkil etgan.
Birinchi beshlikdan tashqarida Singapur va Niderlandiyaning koʻrsatkichlari ham yuqori. Ular mos ravishda kuniga 2,8 million va 2,7 million barrel import qilgan. Har ikki mamlakat yirik neftni qayta ishlash va savdo markazi boʻlib, olib kirilgan neftning salmoqli qismini qayta ishlab, reeksport qiladi.
Osiyo Hoʻrmuz boʻgʻozidagi uzilishlarga sezgir
2025-yilda Osiyo–Tinch okeani mintaqasi mamlakatlari kuniga 38,2 million barrel neft va neft mahsulotlari import qilgan. Bu jahon koʻrsatkichining 50,1 foiziga teng.
