DW xabariga koʻra, Daniya Tashqi ishlar vazirligi Grenlandiya boʻyicha uch tomonlama kelishuvning toʻliq matnini oʻz saytida eʼlon qildi.
Hujjat 22-sentabr kuni Nyu-Yorkda BMT Bosh Assambleyasi sessiyasi doirasida Daniya, uning avtonom hududi boʻlgan Grenlandiya hamda AQSH hukumatlari tomonidan imzolangan.
AQShning harbiy faoliyati kengaytiriladi
Kelishuvda tomonlar NATOning Arktikadagi faolligini oshirishni qoʻllab-quvvatlashi qayd etilgan. Bu harbiy rejalashtirish, mintaqadagi ishtirokni kengaytirish, mashgʻulotlar oʻtkazish va razvedka maʼlumotlarini birgalikda toʻplashni qamrab oladi.
Hujjatga muvofiq, AQShga Grenlandiyadagi Pituffik aerokosmik harbiy bazasini modernizatsiya qilish va uning faoliyatini kengaytirishga ruxsat beriladi.
Shuningdek, Narsarssuak aholi punkti va Mestersvig harbiy tayanch punktida qoʻshimcha «mudofaa hududlari» tashkil etilishi mumkin. Bu ishlar tomonlar kelishgan shartlar va texnik tafsilotlar asosida amalga oshiriladi.
Kelishuv AQShga orolda qoʻshimcha mudofaa hududlarini tashkil etish, harbiy operatsiyalarini kuchaytirish yoki harbiy obyektlarini mustahkamlash imkonini ham beradi.
Tomonlarning har biri Shimoliy Atlantika shartnomasi qamrab olgan hudud, Grenlandiya va Amerika qitʼasini himoya qilish uchun yangi mudofaa hududi zarurligini bildirishi mumkin.
Samolyotlar va kemalar harakatiga oid qoidalar
Hujjatga koʻra, Amerika samolyotlari Grenlandiyaning butun hududi, jumladan, hududiy suvlari ustidan uchib oʻtishi va u yerga qoʻnishi mumkin.
AQSH davlat kemalariga esa Grenlandiya hududiy suvlariga suv ostida kirish va ular doirasida harakatlanish huquqi beriladi. Bunda faqat kelishuv tomonlari oʻzaro belgilagan cheklovlar qoʻllanadi.
Shu bilan birga, tomonlar Grenlandiyada josuslikka qarshi kurashish boʻyicha hamkorlik qilish majburiyatini olgan.
Kelishuv muddatsiz amal qiladi
Grenlandiya boʻyicha kelishuvning amal qilish muddati cheklanmagan. Uni faqat tomonlarning oʻzaro roziligi bilan, 1951-yilgi Mudofaa toʻgʻrisidagi kelishuvning XIII moddasiga muvofiq oʻzgartirish mumkin.
