AQSH Davlat kotibi Marko Rubio oktabr oyida yirik biznes-delegatsiya boshchiligida Oʻzbekistonga tashrif buyuradi. Samarqandda u C5+1 uchrashuvida ishtirok etadi hamda savdo, investitsiyalar va iqtisodiy hamkorlik boʻyicha muzokaralar oʻtkazadi.
Boʻlajak tashrif haqida Janubiy va Markaziy Osiyo boʻyicha AQSH maxsus vakili Serjio Gor maʼlum qildi. Uning soʻzlariga koʻra, delegatsiya tarkibida 100 dan ortiq Amerika kompaniyalari vakillari bor.
Tashrifdan koʻzlangan asosiy maqsad AQSH va Oʻzbekiston oʻrtasidagi savdo hamda investitsiyaviy imkoniyatlarni kengaytirishdan iborat. Amerika tomoni, shuningdek, Markaziy Osiyoda iqtisodiy modernizatsiyani qoʻllab-quvvatlash va ishbilarmonlik aloqalarini rivojlantirish masalalarini muhokama qilish niyatida.
Tashrif doirasida Rubio Qozogʻiston, Qirgʻiziston, Tojikiston, Turkmaniston va Oʻzbekiston tashqi siyosat idoralari rahbarlari ishtirokidagi C5+1 formatidagi vazirlar uchrashuvida qatnashadi.
Muzokaralarda mintaqaning iqtisodiy bogʻliqligi, energetika xavfsizligi hamda Markaziy Osiyo davlatlari va AQSH boshqa umumiy ustuvor yoʻnalishlarini muhokama qilish rejalashtirilgan.
Bundan tashqari, AQSH Davlat kotibi Oʻzbekiston rahbariyati va mintaqadagi hamkasblari bilan uchrashadi. Savdo hajmini oshirish, xususiy investitsiyalarni jalb qilish va iqtisodiy sheriklikni yanada rivojlantirishga alohida eʼtibor qaratiladi.
