Bolalar ombudsmani Namangan viloyati Uchqoʻrgʻon tumanidagi bogʻchalardan birida tarbiyalanuvchi bolaga nisbatan sodir etilgan jinsiy zoʻravonlik yuzasidan Maktabgacha va maktab taʼlim vazirligiga taqdimnoma kiritdi.
Qayd etilishicha, taqdimnoma orqali Bolalar ombudsmani maktabgacha taʼlim tashkilotida tarbiyalanuvchiga nisbatan jinsiy zoʻravonlik holati yuzasidan oʻtkazilayotgan xizmat tekshiruvi natijalarini tanqidiy koʻrib chiqish, aniqlangan kamchiliklar yuzasidan tegishli choralar koʻrilishini hamda masʼul xodimlarning belgilangan tartibda javobgarligi masalasini taʼminlashni soʻragan.
Shuningdek, mazkur hodisaning sodir etilishiga imkon bergan sabab va shart-sharoitlarni bartaraf etish, barcha maktabgacha taʼlim tashkilotlarida bolalar xavfsizligini taʼminlash, kelgusida ushbu holatlarga takroran yoʻl qoʻymaslik hamda ularning oldini olishga qaratilgan zarur choralar koʻrish talab etilgan.
Jumladan,
respublikaning barcha maktabgacha taʼlim tashkilotlarida bolalar xavfsizligini qatʼiy taʼminlash choralarini kuchaytirish;
maktabgacha taʼlim tashkilotlari xodimlarining oʻz kasbiy vazifalarini bajarishi ustidan masʼullar tomonidan manzilli tekshiruvlar tashkil etish;
maktabgacha taʼlim tashkilotlarida bolalar xavfsizligini taʼminlashga qaratilgan ichki nazorat mexanizmlari qayta koʻrib chiqilib, aniqlangan kamchiliklarni bartaraf etish zarurligi koʻrsatilgan.
Qonunchilikka muvofiq, taqdimnoma ijrosi yuzasidan amalga oshirilgan ishlar natijasi haqida Vazirlik 15 kunlik muddatda Bolalar ombudsmaniga barcha hujjatlar nusxasini ilova qilgan holda maʼlumot berishi zarurligi belgilangan.
Avvalroq Uchqoʻrgʻon tumanidagi davlat bogʻchasida 5 yoshli qizaloq 52 yoshli xoʻjalik ishlari boʻlimi mudiri tomonidan zoʻrlab kelingani xabar qilingandi. Holat yuzasidan jinoyat ishi qoʻzgʻatilgan. Gumonlanuvchi ushlangan va ehtiyot chorasi sifatida qamoqqa olingan.
Maktabgacha va maktab taʼlimi vazirligi maxsus ishchi guruh tuzilganini maʼlum qildi
