«Dunyo» axborot agentligi xabariga koʻra, mazkur muassasada hozirda 66 nafar Oʻzbekiston fuqarosi jazo muddatini oʻtamoqda.
Bosh konsul vatandoshlar bilan yakka tartibda suhbatlashib, ularning murojaat va iltimoslarini tinglagan. Huquqbuzarliklar xususiyatiga oid maʼlumotlar oʻrganilib, tegishli maslahatlar berilgan.
Murojaatlar asosida yurak va umurtqa pogʻonasi kasalliklaridan aziyat chekayotgan ikki nafar fuqaroga zudlik bilan tibbiy yordam koʻrsatish boʻyicha chora-tadbirlar belgilangan.
Shuningdek, muassasa rahbariyati bilan oʻzbekistonliklar uchun musulmon qonun-qoidalariga muvofiq ovqatlanishni tashkil etish masalasi koʻrib chiqilgan.
Bir oydan soʻng koloniyadan ozod etilishi kutilayotgan vatandoshga Oʻzbekistonga qaytish sertifikatini berish masalasi ham tezkor hal etilgan.
Uchrashuvda diplomatik vakolatxona fuqarolar sodir etgan huquqbuzarliklarning xususiyatidan qatʼi nazar, ularning qonuniy huquq va manfaatlarini himoya qilishi taʼkidlangan. Vatandoshlarga bundan buyon ham zarur konsullik-huquqiy va yuridik yordam koʻrsatishga tayyorlik bildirilgan.
Diplomatik vakolatxona vakillarining jazoni oʻtash joylariga navbatdagi tashrifini oktabr oyida Irkutskda amalga oshirish rejalashtirilgan.
