Prezident administratsiyasi rahbarining bildirishicha, mazkur tashabbus barcha ishtirokchi davlatlar tomonidan maʼqullangan va kongressning yakuniy deklaratsiyasida oʻz aksini topgan.
BMT Bosh Assambleyasidan soʻng ishini Abu-Dabida davom ettirgan Saida Mirziyoyeva dunyoning turli mamlakatlaridan 5 mingga yaqin vakil qatnashayotgan anjumanda ishtirok etdi.
Kongressda transmilliy jinoyatchilik, terrorizm, narkotrafik, korrupsiya va ekologik huquqbuzarliklarga qarshi kurashish masalalari muhokama qilindi. Shuningdek, bolalarni himoya qilish va qonun ustuvorligini mustahkamlash choralari koʻrib chiqildi.
Anjuman doirasida Saida Mirziyoyeva BMT Bosh kotibi oʻrinbosari, BMTning Narkotiklar va jinoyatchilik boʻyicha boshqarmasi ijrochi direktori Monika Juma bilan uchrashdi. U Oʻzbekiston mazkur tuzilma bilan faol hamkorlik qilib, qator qoʻshma loyihalarni amalga oshirayotganini taʼkidladi.
Saida Mirziyoyeva navbatdagi kongressni Oʻzbekistonda oʻtkazish qarorini mamlakatga bildirilgan yuksak xalqaro ishonch ramzi sifatida baholadi.
«Oldinda besh yillik tayyorgarlik davri turibdi. 2031-yilda mamlakatimiz butun dunyodan keladigan delegatlarga mezbonlik qiladi», - dedi u.
