Naked Science nashri yoritgan Visual Capitalist infografikasida mamlakatlarning 2025-yildagi dizel eksporti koʻrsatkichlari taqqoslangan. Maʼlumotlar Joint Organisations Data Initiative - JODI va Neft eksport qiluvchi mamlakatlar tashkiloti - OPEKning oylik statistikasi asosida yillik oʻrtacha qiymatlar sifatida hisoblangan.
AQShdan keyingi oʻrinda turgan Rossiya kuniga oʻrtacha 783,4 ming barrel, Saudiya Arabistoni esa 678,2 ming barrel dizel eksport qilgan.
Birinchi beshtalikka Hindiston va Janubiy Koreya ham kirgan. Ularning har biri sutkasiga 500 ming barreldan ortiq dizel yonilgʻisini tashqi bozorlarga yetkazib bergan.
AQShning yetakchiligi yirik qayta ishlash quvvatlari bilan bogʻliq
Materialda AQShning eksportdagi ustunligi, asosan, mamlakat neftni qayta ishlash sanoatining koʻlami bilan izohlangan.
2026-yil yanvar holatiga koʻra, AQShda 130 ta faol neftni qayta ishlash zavodi mavjud boʻlgan. Ularning neftni birlamchi qayta ishlash boʻyicha umumiy quvvati sutkasiga 18,2 million barrelni tashkil etgan.
Ayrim mamlakatlar eksportida qayta eksportning ulushi katta
Niderlandiya, Singapur va Belgiya birgalikda jahon dizel eksportining 12,9 foizini taʼminlagan. Biroq bu hajmning sezilarli qismi qayta eksport hissasiga toʻgʻri keladi.
Ushbu mamlakatlar yirik savdo markazlari sifatida dizel yonilgʻisini import qiladi, saqlaydi, turli partiyalarni aralashtiradi va keyin boshqa bozorlarga joʻnatadi. Shu sababli ularning eksport koʻrsatkichlari faqat oʻz zavodlarida ishlab chiqarilgan yonilgʻi hajmini anglatmaydi.
Yevropa eksportda birinchi, ammo importga ham ehtiyoj katta
Mintaqalar kesimida Yevropa jahon dizel eksportining 35,3 foizi bilan birinchi oʻrinni egallagan. Yevropaning ushbu eksport hajmida Rossiya ulushi chorakdan koʻproqni tashkil etgan.
Yevropa eksportining katta qismi mintaqa ichidagi savdodan iborat. Jumladan, Germaniya, Italiya va Ispaniyadagi neftni qayta ishlash korxonalari qoʻshni mamlakatlarga yonilgʻi yetkazib beradi.
