Innovatsion rivojlanish agentligi xabariga koʻra, 29-sentabr kuni eʼlon qilingan reytingda Oʻzbekiston daromadi oʻrtachadan past boʻlgan 36 mamlakat orasida sakkizinchi, Markaziy va Janubiy Osiyodagi 11 mamlakat orasida esa toʻrtinchi oʻrinni qayd etgan.
Mamlakat innovatsiyalarga yoʻnaltiriladigan sarmoya va resurslar subindeksida bir pogʻona koʻtarilib, 68-oʻrinni egallagan. Innovatsiyalar natijadorligi subindeksida esa 14 pogʻona yuqorilab, 78-oʻringa chiqqan.
Ayrim indikatorlar boʻyicha Oʻzbekiston eng yuqori natijalarni qayd etgan davlatlar qatoridan joy olgan. Jumladan:
ilm-fan va muhandislik sohasidagi bitiruvchilar boʻyicha - 2-oʻrin;
tadbirkorlik siyosati va madaniyati boʻyicha - 3-oʻrin;
startaplar va faoliyatini kengaytirayotgan kompaniyalarni moliyalashtirish boʻyicha - 4-oʻrin;
mehnat unumdorligi oʻsishi boʻyicha - 7-oʻrin.
Global innovatsiya indeksi Butunjahon intellektual mulk tashkiloti - WIPO tomonidan Portulans instituti va boshqa hamkorlar ishtirokida har yili tayyorlanadi. U mamlakatlarning innovatsion rivojlanishini ikkita subindeks va yettita yoʻnalishga birlashtirilgan qariyb 80 ta indikator asosida baholaydi.
Agentlik maʼlumotiga koʻra, Oʻzbekiston 2015-yilda mazkur reytingda 141 mamlakat orasida 122-oʻrinni, 2025-yilda esa 139 mamlakat orasida 79-oʻrinni egallagan.
Prezidentning 2026-yil 16-fevraldagi PF–21-son farmonida Oʻzbekistonni 2030-yilgacha Global innovatsiya indeksida yetakchi 60 mamlakat qatoriga kiritish vazifasi belgilangan. 2026-yil uchun maqsadli koʻrsatkich 77-oʻrin etib belgilangan boʻlib, eʼlon qilingan natija ushbu maqsadga mos keldi.
