Assotsiatsiyaning rasmiy ochilish tadbiri 29-sentabr kuni Toshkentdagi Azimut Grand Hotel mehmonxonasida oʻtkazildi. Unda Turizm qoʻmitasi va Tashqi ishlar vazirligi vakillari, xorijiy davlatlarning elchixonalari va diplomatik korpusi vakillari, turizm sohasi mutaxassislari hamda xalqaro hamkorlar qatnashdi.
Assotsiatsiya faoliyatining asosiy yoʻnalishlaridan biri Indoneziya, Malayziya va boshqa mamlakatlardan ziyoratchilarni «Umra plyus» dasturi doirasida Oʻzbekistonga jalb qilishdir. Bunda Umra safari Oʻzbekistondagi tarixiy va diniy maskanlarga tashrif bilan birlashtirilishi koʻzda tutilmoqda.
Dastur doirasida Toshkent, Samarqand va Buxoroni oʻz ichiga olgan turistik yoʻnalishlar ishlab chiqilishi belgilangan. Hukumat qarorida Malayziya va Indoneziyadan ziyorat turizmi yoʻnalishida 2026–2027-yillarda 100 ming nafar sayyoh jalb qilish boʻyicha yoʻl xaritasi tasdiqlangan.
Shuningdek, dastur ishtirokchilari uchun turistik xizmatlarni rivojlantirish, aviaqatnovlarni yoʻlga qoʻyish va xorijiy turoperatorlar bilan hamkorlikni kengaytirish nazarda tutilgan. Masalan, Kuala-Lumpurdan Samarqand yoki Buxoro orqali Saudiya Arabistoniga borishni oʻz ichiga olgan yoʻnalishlar ham koʻrsatilgan.
Bu tashabbus amalda ham xalqaro hamkorlik bilan rivojlantirilmoqda. Sentabr oyida Olmaotada «Umra plyus» xalqaro turizm yarmarkasi oʻtkazilib, 2026-yil oxirigacha qariyb 10 ming nafar ziyoratchini Oʻzbekistonga jalb qilish boʻyicha kelishuvlarga erishilgani maʼlum qilindi.
Oʻzbekiston va Malayziya turistik tashkilotlari oʻrtasida ham «Umra plyus» dasturi doirasida hamkorlik memorandumi imzolangan. Unda qoʻshma loyihalar, tajriba almashish va ziyorat turizmi yoʻnalishidagi hamkorlikni rivojlantirish koʻzda tutilgan.
«Umra plyus» dasturining oʻzi 2026-yil 9-yanvardagi Vazirlar Mahkamasining 6-son qarori bilan rivojlantirilmoqda. Qarorga koʻra, 2026-yil yakunigacha dastur asosida Malayziya va Indoneziyadan sayyoh jalb qiluvchi turoperatorlarga har bir sayyoh uchun 100 AQSH dollari miqdorida subsidiya ajratilishi belgilangan.
Yangi tashkil etilgan assotsiatsiya esa shu yoʻnalishdagi ishlarni xalqaro darajada muvofiqlashtirish, xorijiy turistik bozorlar bilan hamkorlikni kengaytirish va Oʻzbekistonni ziyorat turizmining muhim yoʻnalishlaridan biriga aylantirishni maqsad qilmoqda.
