Paramount 6-oktabr kuni bitim yakunlanganini eʼlon qildi. Bu AQSH mediaindustriyasi tarixidagi eng yirik birlashuvlardan biri hisoblanadi.
Bitimni yakunlash yoʻlidagi soʻnggi toʻsiq bir necha kun avval bartaraf etilgan: Kaliforniyadagi sudya kompaniyaning 12 shtat bilan kelishuvini maʼqullagan.
Ushbu shtatlar ikki yirik kinostudiyaning birlashishi raqobatni cheklashi mumkinligidan xavotirlanib, bitimga qarshi chiqqan edi. Kelishuv doirasida Paramount AQSH hududida kino ishlab chiqarishga qoʻshimcha sarmoya kiritish majburiyatini olgan.
Endi yangi mediaguruh oldida kompaniyalar faoliyatini birlashtirish va oʻnlab milliard dollarlik qarzlarni toʻlash vazifasi turibdi. Hollivudda bitim ortidan ish oʻrinlari ommaviy qisqarishi mumkinligidan xavotir bildirilmoqda.
Birlashuvning siyosiy oqibatlari, ayniqsa CNN tahririy mustaqilligiga taʼsiri ham bahslarga sabab boʻlmoqda.
Paramount 2025-yildan buyon texnologik milliarder Larri Ellison oilasi nazoratida. Oracle korporatsiyasi asoschisi boʻlgan Ellison AQSH prezidenti Donald Trampni bir necha bor ochiq qoʻllab-quvvatlagan va uning saylov kampaniyasiga mablagʻ ajratgan.
Paramount avvaldan CBS telekanaliga egalik qilar edi. Warner Bros. Discovery xaridi orqali kompaniya CNN ustidan ham nazoratni qoʻlga kiritdi. Tramp esa CNN'ni oʻzi va maʼmuriyati haqida yolgʻon xabarlar tarqatishda bir necha bor ayblagan.
Shu sababli bitim atrofidagi muhokamalar faqat kino bozoridagi raqobat bilan cheklanmayapti. Yirik axborot telekanallarining bir mulkdor nazoratida jamlanishi va ularning tahririy mustaqilligini saqlash masalasi ham eʼtibor markazida turibdi.
