Prezidentning joriy yil 20-yanvardagi tegishli qarori asosida Oʻzbekistonda ilk bor Infarkt va insultga qarshi kurashish Milliy dasturi qabul qilindi.
Unga koʻra, shu yilning 1-noyabridan Oʻzbekistondagi umumtaʼlim maktablarida “Angels Initiative” xalqaro tashabbus tashkilotining “FAST - superqahramonlar” xalqaro taʼlim dasturi bosqichma-bosqich joriy etiladi.
Loyiha birinchi sinfdan toʻrtinchi sinfgacha boʻlgan oʻquvchilarga moʻljallangan boʻlib, ilk bosqichda Toshkent shahrining Olmazor tumanidagi 7 ta hamda Samarqand shahar, Kattaqoʻrgʻon va Ishtixon tumanlaridagi 6 ta umumtaʼlim maktabida mashgʻulotlar tashkil etiladi.
Xalqaro hamkorlik doirasida ishlab chiqilgan ushbu dastur Germaniya, Italiya, Ispaniya, Portugaliya, Braziliya, Kanada, Gretsiya, Islandiya, Janubiy Afrika Respublikasi, Latviya, Slovakiya, Vengriya, Bolgariya va Singapur kabi dunyoning 40 ga yaqin davlatida 2 million nafardan ortiq bolani qamrab olgan.
Oʻzbekistonda “FAST - superqahramonlar” xalqaro dasturining rasmiy veb-sayti hamda ijtimoiy tarmoqlarda sahifasi ishga tushirildi. U orqali dasturga oid maʼlumotlar, taʼlimiy materiallar va loyiha doirasidagi yangiliklar bilan tanishish mumkin.
Loyihaning asosiy maqsadi - oʻquvchilarga oʻyin va qiziqarli mashgʻulotlar orqali insultning dastlabki belgilarini tanish, oʻz salomatligi va yaqinlari sogʻligʻiga masʼuliyat bilan munosabatda boʻlish hamda shoshilinch vaziyatlarda toʻgʻri harakatlanish koʻnikmalarini shakllantirishga qaratilgan.
Mashgʻulotlar davomida bolalar insonning yuzida asimmetriya paydo boʻlishi, bir qoʻlini koʻtara olmasligi yoki gapirishda qiyinchilik kuzatilishi insult belgisi boʻlishi mumkinligini oʻrganadi.
Bunday holatlarda vaqtni boy bermaslik, kattalarni shoshilinch xabardor qilish va «103» raqamiga murojaat etish boʻyicha amaliy tushunchalar beriladi. Shuningdek, favqulodda vaziyatlarda tez tibbiy yordam xizmatining ahamiyati singdiriladi.
Murakkab tibbiy tushunchalar bolalarga ularning yoshi va idrokiga mos ravishda, oʻyin elementlari, qahramonlar va videomateriallar yordamida yetkaziladi.
