Migratsiya agentligi direktori Muhsinxoʻja Abdurahmonovning Xorvatiyaga tashrifi doirasida mamlakat Savdo-sanoat palatasi (HGK), Ish beruvchilar assotsiatsiyasi (HUP) hamda mahalliy ish beruvchilar bilan muzokaralar oʻtkazildi.
Taklif etilayotgan tizimga koʻra, Xorvatiya ish beruvchilarining kadrlarga boʻlgan ehtiyoji Migratsiya agentligiga taqdim etiladi, nomzodlar esa Oʻzbekistonda kasb va til boʻyicha tayyorlanib, ish beruvchilar ishtirokida saralanadi.
Davlatlararo mexanizm orqali tanlangan nomzodlar uchun ishlash va yashash ruxsatnomalarini rasmiylashtirish jarayonlarini tezlashtirish ham koʻzda tutilmoqda.
Ayni paytda qurilish, payvandchilik va transport yoʻnalishlarida dastlabki amaliy ishlar boshlanishi rejalashtirilgan.
Nomzodlar avval onlayn suhbatdan, keyin esa xorvatiyalik ish beruvchilarning Oʻzbekistonga tashrifi davomida amaliy kasbiy sinovdan oʻtishi nazarda tutilmoqda.
Xorvatiya tomoni maʼlumotiga koʻra, qurilish sohasida boshlangʻich ish haqi 1 300–1 400 yevro atrofida, tasdiqlangan malakaga ega mutaxassislarda esa yuqoriroq boʻlishi mumkin.
Shuningdek, turizm, mehmonxona-restoran xizmati, tibbiyot va savdo sohalarida ham kadrlarga ehtiyoj yuqori ekani bildirildi.
