Germaniyaning Mercedes-AMG kompaniyasi yangi GT elektr krossoverini namoyish qildi. Avtomobilning old qismi yoritgichli anʼanaviy AMG radiator panjarasini eslatuvchi vertikal metall chiziqli dekorativ panel bilan bezatilgan. Old faralar uch nurli yulduz shaklidagi kunduzgi chiroqlarga ega boʻldi, orqa tomonga esa gorizontal diodli chiziq bilan uygʻunlashgan oltita dumaloq yorugʻlik elementi oʻrnatilgan.
Shuningdek, avtomobilning oʻziga xos jihatlari qatoridan romsiz yon oynalar, kengaytirilgan gʻildirak arkalari va yashirin eshik tutqichlari joy olgan.
Yangi modelning uzunligi 5080 mm dan 5084 mm gacha, kengligi 2001 mm, balandligi 1653 yoki 1656 mm, gʻildirak bazasi esa 3040 mm ni tashkil etadi.
Aerodinamikaga alohida eʼtibor qaratilgan. AMG GT 55 va GT 63 versiyalarining tom qismida faol spoyler koʻzda tutilgan boʻlib, tezlik 150 km/soatga yetganda u oʻz holatini oʻzgartira boshlaydi. Tezlik va harakatlanish sharoitlariga qarab, u havo qarshiligini kamaytirishi yoki bosim kuchini oshirishi mumkin.
Bundan tashqari, old bamperga boshqariluvchi vertikal jalyuzilar oʻrnatilgan. Odatiy sharoitlarda ular yopiq turadi, ammo zarurat tugʻilganda qoʻshimcha sovitish uchun ochiladi.
Mercedes-AMG GT 53 boshlangʻich versiyasi har bir oʻqda bittadan - jami ikkita sinxron elektr dvigatel bilan jihozlangan. Ularning umumiy quvvati 544 ot kuchini tashkil etadi.
Quvvatliroq GT 55 va GT 63 modellari esa oʻq boʻylab yoʻnalgan magnit oqimli uchta elektr dvigatelga ega boʻldi. Ulardan ikkitasi orqa oʻqqa, yana bittasi old oʻqqa oʻrnatilgan. Mercedes-AMG GT 55 816 ot kuchini ishlab chiqarsa, flagman GT 63 ning maksimal quvvati 1169 ot kuchiga yetadi.
Eng qudratli krossover joyidan 100 km/soat tezlikka 2,5 soniyada erishadi, 200 km/soatlik marrani esa 6,8 soniyada zabt etadi.
