Bugun, 19-oktabr kuni Samarqandda «Markaziy Osiyo – AQSH» mintaqaviy muloqoti doirasida tashqi ishlar vazirlarining «C5+1» formatidagi uchrashuvi boʻlib oʻtdi. Shu munosabat bilan Mirziyoyev toʻrt vazir bilan alohida-alohida uchrashlar oʻtkazdi, deb bermoqda Kun.uz muxbiri. «Butun dunyo Markaziy Osiyoni yagona kuch sifatida qabul etmoqda», dedi Oʻzbekiston yetakchisi.
Suhbatlarda mintaqaviy hamkorlik masalalari yuzasidan ham fikr almashildi.
Qozogʻiston tashqi ishlar vaziri Muxtar Tilovberdi bilan uchrashuvda ikki davlat oʻrtasidagi strategik sheriklik va ittifoqchilik munosabatlarini mustahkamlash masalalari koʻrib chiqildi. Prezident administratsiyalari, parlamentlar, hukumatlar va hududlar darajasidagi faol aloqalar yuksak baholandi. Qayd etilishicha, tovar ayirboshlash hajmi izchil oʻsmoqda, sanoat, transport, energetika, qishloq xoʻjaligi va qurilish sohalarida kooperatsiya loyihalari amalga oshirilmoqda. Tomonlar kelgusi yil uchun tadbirlar rejasini shakllantirish muhimligini taʼkidladi.
Qirgʻiziston tashqi ishlar vaziri Jeenbek Kulubayev bilan suhbatda asosiy eʼtibor 2026-yil iyulida Qirgʻizistonga qilgan davlat tashrifi chogʻida erishilgan kelishuvlar ijrosiga qaratildi. Energetika va transport sohalaridagi yirik mintaqaviy loyihalar ham tilga olindi. Kelgusi yilga moʻljallangan madaniy-gumanitar tadbirlar va hududlararo almashinuvlar rejasini qabul qilish muhimligi taʼkidlandi.
Tojikiston tashqi ishlar vaziri Sirojiddin Muhriddin bilan uchrashuvda oliy darajadagi kelishuvlar doirasida ikki davlat ittifoqchilik munosabatlarini rivojlantirish masalalari muhokama qilindi. Qayd etilishicha, oʻzaro savdo va yuk tashish hajmi ortib bormoqda. Energetika, sanoat, qishloq va suv xoʻjaligidagi kooperatsiya loyihalari esa faol bosqichga kirgan.
