Rishi Sunak Britaniyaning yangi bosh vaziri bo‘ladi. Unga raqib qolmadi

Buyuk Britaniyaning sobiq moliya vaziri Rishi Sunak Konservativ partiyaning yangi rahbari va o‘z-o‘zidan mamlakatning yangi bosh vaziriga aylanadi.

BBC News xabariga ko‘ra, bosh vazirlikka ovoz berish jarayonida u Konservativ partiya rahbarligi uchun yagona nomzod bo‘lib qoldi - Jamoatlar palatasi raisi Penni Mordont Sunak foydasiga o‘z nomzodini qaytarib olishini e’lon qildi.

Qayd etish kerakki, Mordont xonim saylovda rasman nomzodini ilgari surish uchun yetarli miqdorda (100 nafar) deputatlar qo‘llab-quvvatloviga ega bo‘la olmadi. OAVdagi so‘nggi ma’lumotlarga ko‘ra, parlamentdagi konservator deputatlarning (jami 357 nafar) 193 nafari Sunakni qo‘llashini bildirgan, Mordontda esa 26 nafar tarafdor bo‘lgan. 

Kun avvalida sobiq bosh vazir Boris Jonson 102 nafar deputat tomonidan qo‘llab-quvvatlovga ega ekani, lekin hozirda hukumat rahbarligiga qaytish uchun qulay vaqt emas deb topib, saylovda qatnashish niyatidan voz kechganini aytgandi.

Sunak yangi bosh vazir bo‘lishi haqida Jamoatlar palatasida partiyaning yangi rahbarini saylash jarayoni bilan shug‘ullanuvchi qo‘mitani boshqaruvchi ser Grem Bredi ham ma’lum qilgan. BBC News siyosiy sharhlovchilariga ko‘ra, yangi yetakchi rasman 25 oktyabr kunidanoq lavozimga kirishadi.

• Rishi Sunak Buyuk Britaniya Jamoatlar palatasiga ilk bor 2015 yilda saylangan. Uch yil o‘tib u Tereza Mey hukumatida vazir yordamchisi lavozimini olgan. 2019 yil iyulida uni Boris Jonson hukumatida g‘aznachilik bosh kotibi etib tayinlashadi. 2020 yil fevralidan esa Sunak Britaniya moliya vazirligini boshqarishga kirishadi.
• Sunak Konservativ partiya yetakchiligi uchun yozda bo‘lib o‘tgan saylovlarda ham favoritlardan edi, ammo final bosqichida sobiq tashqi ishlar vaziri Liz Trassga yutqazib qo‘ydi. Trass xonim mamlakat bosh vazirligida sentabr-oktyabr oylarida jami 45 kun bo‘ldi, u taklif etgan iqtisodiy islohotlar juda yomon qarshi olingach, iste’fo berishga majbur bo‘ldi.