14:26 / 11.10.2021
8594

Qashqadaryodagi barcha kasb-hunar markazlari «O‘zbekneftgaz» AJ tizimiga biriktiriladi

O‘zbekiston Liberal-demokratik partiyasidan O‘zbekiston Respublikasi Prezidentligiga nomzod Shavkat Mirziyoyev saylovchilar bilan uchrashish hamda davlat rahbari sifatida bunyodkorlik ishlari bilan tanishish maqsadida Qashqadaryo viloyatiga keldi.

Foto: Prezident matbuot xizmati

Qashqadaryoda ishsizlar va yoshlarni kasb-hunarga o‘qitishning mutlaqo yangi tizimi joriy etiladi. Bu haqda prezidentlikka nomzod Shavkat Mirziyoyev ma'lum qildi.

“Men “O‘zbekneftgaz” AJ Boshqaruv raisi Mehriddin Abdullayev bilan batafsil gaplashdim. Qashqadaryoda bu jamiyat ishtirokida yangicha tizim yo‘lga qo‘yamiz. Bunda neft va gaz sohasining viloyatda faoliyat ko‘rsatayotgan 5 ta yirik korxona mutaxassislari tajribasidan foydalanamiz. Endi, hududdagi barcha kasb-hunar markazlari ikkita eng yirik bo‘lgan Sho‘rtan gaz kimyo majmuasi va Muborak gazni qayta ishlash zavodiga biriktiriladi.

Foto: Prezident matbuot xizmati

Bu degani, shu korxona mutaxassislari talab yuqori bo‘lgan mutaxassislarni viloyat bo‘yicha tayyorlash rejalarini belgilaydi, o‘quv dasturlar va metodikasini amaliyotdan kelib chiqib, qayta ko‘rib chiqadi, har bir yosh o‘quvchi o‘qish jarayonida o‘z mutaxassisliklari bo‘yicha amaliyot o‘tishini tashkil etadi.

Yangi ochilgan monomarkazda IT, murakkab uskuna operatori va boshqa yuqori texnologik mutaxassisliklar o‘rgatiladi. Shuningdek, har bir tumanda kamida beshtadan, jami viloyatda 90 ta kasbga o‘qitish maskanlarida tumanning ixtisosligidan kelib chiqib, yoshlar va ishsizlar kasbga bepul o‘qitiladi.

Foto: O‘zbekneftgaz

Shu tizim orqali, kelgusi besh yilda 150 mingdan ziyod ishsizlar va yoshlar tadbirkorlik va kasb-hunarga o‘qitiladi. Bundan tashqari, Shahrisabz, Kitob, Kasbi hamda Qarshi shahrida hunarmandchilik markazlari qurilib, 15 mingdan ziyod yoshlar shogirdlikka olinadi”, dedi prezidentlikka nomzod Shavkat Mirziyoyev.

Mavzuga oid
Top