New York Times nashri AQSH prezidenti Donald Trampga xorijiy davlatlardan yuborilgan sovgʻalarni tilga oldi. Ular qatorida Qatardan hashamatli samolyot, Saudiyada bir juft qoplon va Oʻzbekiston prezidenti tomonidan tuhfa qilingan «nafis ishlangan» shiyponlar bor.
Oʻzbekiston shiyponlari – Trampning Amerika qahramonlari milliy bogʻi barpo etilishi rejalashtirilgan Gʻarbiy Potomak parkida namoyish etiladi.
«Oʻzbekiston prezidenti Shavkat Mirziyoyev anʼanaviy oʻzbek shiyponlarini saxovat bilan hadya qildi. Prezident Donald Tramp [ularni] AQSH xalqi nomidan qabul qilib oldi», deya AQSH Ichki ishlar departamenti aloqalar boʻyicha direktori Keti Martinning soʻzlarini keltirmoqda NYT.
Maʼlum qilinishicha, Gʻarbiy Potomak parkiga tashrif buyuruvchilar shu yil kuz fasli oxiridayoq «nafis ishlangan ayvonlardan bahramand boʻlishlari» mumkin.
Ushbu hadyani Oʻzbekistonning AQShdagi elchisi Furqat Siddiqov ham tasdiqladi. Uning aytishicha, oʻzbek sanʼati asari Vashingtondagi Amerika qahramonlari bogʻining bir qismiga aylanmoqda.
«Oʻzbekiston prezidentining AQSH prezidenti va Amerika xalqiga sovgʻasi boʻlgan ikkita anʼanaviy oʻzbek shiyponi (ayvoni) oʻzaro doʻstligimiz va strategik sherikligimiz ramzi boʻlib xizmat qiladi», deyiladi elchining postida.
NYT tarqatgan va elchi joylagan postdagi rasmlarda ham koʻrish mumkinki, shiyponni ichki qismida qandil ham oʻrnatilishi rejalashtirilgan.
Biroq, har ikkala loyiha ham hali rejalashtirishning dastlabki bosqichida turibdi. Qahramonlar bogʻi boʻyicha har qanday reja, shu jumladan individual haykallarning dizaynlari ham, odatda Milliy poytaxtni rejalashtirish komissiyasi va Tasviriy sanʼat komissiyasi orqali tasdiqdan oʻtishi talab qilinadi.
Shu hafta Adliya vazirligi ham federal sudga ushbu bogʻ «hali ham faqat dastlabki konsepsiya» boʻlib qolayotganini maʼlum qilgandi.
