Prezident matbuot xizmati xabariga koʻra, Shavkat Mirziyoyev Qosim-Joʻmart Toʻqayevga yoʻllagan maktubida Qurultoyga saylovlar xalqaro standartlar va demokratik tamoyillar asosida muvaffaqiyatli oʻtkazilgani munosabati bilan samimiy tabriklarini bildirgan.
Oʻzbekiston rahbari ushbu tarixiy voqea Qozogʻiston siyosiy tizimini takomillashtirish, davlat boshqaruvi samaradorligini oshirish hamda parlamentning mamlakat hayotidagi rolini sezilarli darajada kuchaytirishda yangi bosqichni boshlab berganini qayd etgan.
Shuningdek, saylovlarda fuqarolarning faol ishtirok etgani Qosim-Joʻmart Toʻqayev rahbarligida amalga oshirilayotgan keng koʻlamli konstitutsiyaviy va ijtimoiy-siyosiy islohotlar xalq tomonidan qoʻllab-quvvatlanayotganining yorqin tasdigʻi ekani taʼkidlangan.
Mazkur islohotlar Qozogʻistonning barqaror taraqqiyotini taʼminlash, shuningdek, mamlakatning xalqaro maydondagi nufuzi va taʼsirini yanada oshirishga qaratilgani qayd etilgan.
Shavkat Mirziyoyev Oʻzbekistonda koʻp asrlik doʻstlik va yaxshi qoʻshnichilik rishtalari bilan bogʻlangan qardosh qozoq xalqi zaminida amalga oshirilayotgan keng koʻlamli yangilanishlarning yuksak natijalaridan samimiy mamnun ekanini bildirgan.
Prezident, shuningdek, Oʻzbekiston va Qozogʻiston parlamentlari oʻrtasidagi yaqin hamkorlik ikki mamlakat oʻrtasidagi strategik sheriklik va ittifoqchilik munosabatlari ruhida yangi sifat bosqichiga koʻtarilishiga ishonch bildirgan.
Maktub yakunida Shavkat Mirziyoyev Qosim-Joʻmart Toʻqayevga mustahkam sogʻlik, farovonlik va davlatchilik faoliyatida katta muvaffaqiyatlar, qardosh Qozogʻiston xalqiga esa tinchlik va ravnaq tilagan.
