O‘zbekistondagi blekaut sabablari hukumat komissiyasi tomonidan o‘rganiladi

Energetika vazirligi Markaziy Osiyo yagona elektr tarmog‘ida katta avariya bo‘lishi oqibatida O‘zbekiston hududlarida elektr energiya ta’minotida yuzaga kelgan o‘chish holatlari bo‘yicha yana bir izoh berdi.

«Prezidentimiz topshiriqlariga binoan elektr energiyasi ta’minotida yuzaga kelgan nosozliklar sababini aniqlash va bartaraf etish bo‘yicha Bosh vazir huzurida hukumat komissiyasi tuzildi. Komissiya tomonidan birinchi navbatda generatsiya jarayonini tiklash hamda yuqori va past kuchlanishli elektr tarmoqlariga kuchlanish berish orqali iste’molchilarning elektr ta’minotini tiklash vazifasi qo‘yildi.  

Hukumat komissiyasi soha vakillariga sodir bo‘lgan nosozliklar takrorlanmasligi, sabablarini aniqlash, elektr ta’minoti barqarorligini ta’minlash bo‘yicha chora-tadbirlar ishlab chiqish hamda zudlik bilan amalga oshirish yuzasidan qator vazifalar yukladi», deyiladi vazirlik xabarida.

Ma’lum qilinishicha, yagona elektr tarmog‘iga ulangan O‘zbekiston elektr tarmog‘i bu avariyaning salbiy ta’siri natijasida Toshkent va Sirdaryo issiqlik elektr stansiyalarida avariyaga qarshi himoya tizimi ishlab ketib, ikkala stansiyaning ham avtomatik ravishda o‘chishiga olib kelgan. Bu holat o‘z o‘rnida Tolimarjon va To‘raqo‘rg‘on issiqlik elektr stansiyalari ish faoliyatiga ham salbiy ta’sir ko‘rsatgan.

Natijada Farg‘ona va Toshkent shahri va viloyati, Farg‘ona vodiysi hududi, Sirdaryo, Jizzax, Samarqand, Buxoro, Qashqadaryo viloyatlari tarmoqlarida elektr energiyasi ta’minotida uzilishlar qayd etilgan.

«Hurmatli iste’molchilar, shuni ham alohida ta’kidlash lozimki, O‘zbekiston elektr ta’minoti tizimi Markaziy Osiyo elektr energetika tizimi bilan parallel ravishda ishlaydi. Umumtizimning ma’lum bir hududida kuzatilgan nosozliklar boshqa hududlarni avariyadan saqlab qolishi, yoki aksincha, uning barqaror ishiga salbiy ta’sir ko‘rsatishi mumkin. Avariyaga qarshi releli himoya va avtomatika tizimi energotizim barqarorligi uchun amalga oshiriladigan texnik-muhandislik holati bo‘lib, u tizimda turli nosozlik hamda yong‘inlar chiqishining oldini oladi. 

Hozirgi vaqtda Toshkent viloyatidagi Chorvoq, Xo‘jakent va Tovoqsoy gidroelektr stansiyalari, Navoiy viloyatidagi Navoiy issiqlik elektr stansiyasi, Qoraqalpog‘iston Respublikasidagi Taxiatosh issiqlik elektr stansiyasi hamda Farg‘ona viloyatidagi Farg‘ona issiqlik elektr markazi orqali energetika tizimiga quvvat uzatish boshlandi.

Ayni paytda respublikamiz hududlarida elektr energiyasi ta’minoti bosqichma-bosqich tiklanmoqda.

Nosozliklar bartaraf etilayotgani haqida qo‘shimcha ravishda axborot berib boriladi», deyiladi vazirlik xabarida.

25 yanvar kuni soat 11:00 larda O‘zbekistonning aksar viloyatlarida elektr energiyasi ta’minoti uzildi. Toshkent metropoliteni faoliyati to‘xtatdi, Toshkent aeroporti ma’lum vaqt davomida reyslarni qabul qilishni to‘xtatdi. «O‘zbekiston temir yo‘llari» ayrim yo‘lovchi poyezdlarning o‘z manzillariga yetib borishi kechikishidan ogohlantirdi. Toshkentda svetoforlar ishlamay qolgani tufayli yo‘llarda tirbandliklar yuzaga kelmoqda, Toshkent shahar IIBB tibandliklarning oldini olish maqsadida ko‘chaga zarurat bo‘lmasa, shaxsiy mashinada chiqmaslikni tavsiya qilgan.