Qashqadaryoda Nexia-2 urib yuborgan to‘rt kishi halok bo‘ldi. Ulardan ikki nafari bolalar

Holat yuzasidan Jinoyat kodeksining 266-moddasi 3-qismi “a” bandiga asosan jinoyat ishi qo‘zg‘atilgan. Haydovchi qamoqqa olingan.

Qashqadaryo viloyati Yakkabog‘ tumanida Nexia-2 mashinasi urib yuborgan to‘rt kishi halok bo‘ldi. Bu haqda viloyat IIB axborot xizmati xabar bermoqda.

Hodisa 2023 yil 3 yanvar kuni soat 18:20 larda M-39 “Toshkent-Termiz” xalqaro avtomobil yo‘lining Yakkabog‘ tumani “Mevazor” MFY hududidan o‘tgan 1 139-kilometrida sodir bo‘lgan.

Yakkabog‘ tumani “Alakuylak” MFYda yashovchi fuqaro Nexia-2 mashinasi bilan Shahrisabz-Yakkabog‘ yo‘nalishida harakatlanayotib, yo‘lning chap tomonidan o‘ng tomoniga o‘tayotgan Yakkabog‘ tumani “Navro‘z” MFYda yashovchi J.X., M.M., voyaga yetmagan Sh.S., Sh.X.ni urib yuborgan.

Oqibatda, og‘ir tan jarohatlari olgan uch nafar fuqaro voqea joyida, bir nafari shifoxonada vafot etgan.

Mazkur holat yuzasidan Yakkabog‘ tuman IIB tergov bo‘limi tomonidan haydovchiga nisbatan Jinoyat kodeksining 266-moddasi 3-qismi “a” bandiga asosan jinoyat ishi qo‘zg‘atilgan.

Qayd etilishicha, haydovchi Jinoyat protsessual kodeksining 221-moddasi tartibida ushlanib, unga nisbatan qamoqqa olish ehtiyot chorasi qo‘llangan.