DW tahliliga koʻra, rusiyzabon saylovchilarning qarashlarini faqat Rossiyaga munosabati orqali tushuntirib boʻlmaydi. Ularni ijtimoiy siyosat, iqtisodiyot, rus tilining mavqei va davlatning milliy ozchiliklarga munosabati ham tashvishlantirmoqda.
Ayrimlar Latviyaning Yevropa yoʻnalishini qoʻllasa, boshqalar Moskva bilan pragmatik munosabatlarni saqlash tarafdori. Yana bir qism saylovchi esa amaldagi hokimiyat siyosatidan umuman norozi.
Rusiyzabon aholi bir xil fikrda emas
Xabarda keltirilishicha, etnik ruslar Latviya aholisining qariyb chorak qismini tashkil etadi. Aholining 37 foizdan ortigʻi esa rus tilini ona tili deb biladi. Bu ikki koʻrsatkich turli tushunchalar - etnik mansublik va ona tiliga taalluqli.
Fridrix Ebert jamgʻarmasi tadqiqotiga koʻra, latishlarning qariyb 80 foizi rasmiy Kiyevni qoʻllab-quvvatlaydi. Rusiyzabon va aralash oilalar orasida bu koʻrsatkich taxminan uchdan bir qismni tashkil etadi.
Shu bilan birga, tadqiqot rusiyzabon aholining aksariyati ham Vladimir Putin siyosatini maʼqullamasligini koʻrsatgan. Biroq ularning Putinga tanqidiy munosabati Latviya hukumatining barcha qarorlarini qoʻllab-quvvatlashini anglatmaydi.
Til siyosati norozilik sabablaridan biri
DW yozishicha, 2022-yildan keyin Latviyada sovet yodgorliklari olib tashlana boshlangan, rus tilidagi peshlavha va yozuvlar qisqartirilgan. Milliy ozchiliklar maktablaridagi taʼlim latish tiliga oʻtkazilmoqda.
Xabarda 1-sentabrdan Rossiyadan kitob olib kirish taqiqlangani, kelasi yil esa jamoatchilik OAVning rus tilidagi eshittirish va koʻrsatuvlari amalda toʻxtashi qayd etilgan.
Madaniyatshunos Denis Xanov bunday siyosat rusiyzabon aholining davlatdan begonalashuvini kuchaytirishi mumkin deb hisoblaydi. Uning fikricha, katta bir aholi guruhiga doim shubha bilan qarash jamiyatdagi ishonchga salbiy taʼsir qiladi.
DW suhbatlashgan Riga aholisi ham tildan qatʼi nazar teng munosabat, ijtimoiy himoya va keksalarga eʼtibor masalalarini koʻtargan.
Qariyb 160 ming kishi saylovda ovoz bera olmaydi
