Toshkent shahri Mirobod tumanida mototsikl haydovchisi oldinda harakatlanayotgan yuk avtomobiliga urilib, boshqaruvni yoʻqotgan, soʻng qarama-qarshi yoʻnalishda harakatlanayotgan Kia avtomobili bilan toʻqnashgan. Hodisa oqibatida mototsikl haydovchisi vafot etgan. Bu haqda Toshkent shahar IIBB YHXB xabar berdi.
Hodisa 25-sentabr kuni soat 22:45 da Mirobod tumanidagi KHAY koʻchasidagi 83-maktab qarshisida sodir boʻlgan.
21 yoshli haydovchi motoransport vositasini boshqarib ketayotib, oraliq masofani saqlay olmagan va oʻzi bilan bir yoʻnalishda harakatlanayotgan 32 yoshli haydovchi boshqaruvidagi GAZ 5312 rusumli transport vositasi bilan toʻqnashgan. Toʻqnashuvdan soʻng mototsikl haydovchisi boshqaruvni yoʻqotgan va qarama-qarshi yoʻnalishda harakatlanayotgan 25 yoshli haydovchi boshqaruvidagi Kia K5 bilan toʻqnashgan.
Hodisa oqibatida mototsikl haydovchisiga birinchi tez tibbiy yordam koʻrsatilgan. Biroq u kasalxonaning jonlantirish boʻlimida vafot etgan.
Holat yuzasidan jinoyat ishi qoʻzgʻatilib, tergov harakatlari olib borilmoqda. Ish Jinoyat kodeksining 266-moddasi (Transport vositalari harakati yoki ulardan foydalanish xavfsizligi qoidalarini buzish) tegishli qismlari asosida qoʻzgʻatilgan.
