O‘zbekiston va Pokiston qishloq xo‘jaligi texnikasini birgalikda ishlab chiqaradi

Muzokaralar chog‘ida qishloq xo‘jaligi yo‘nalishidagi savdo-iqtisodiy aloqalarni mustahkamlash, sohaning turli tarmoqlarida hamkorlikni yanada rivojlantirishga qaratilgan qo‘shma chora-tadbirlar muhokama qilindi.

"Qishloq xo‘jaligi sohasi hozirgi kunda ikki mamlakat o‘rtasidagi savdo-iqtisodiy munosabatlarning lokomotivi hisoblanadi. O‘zaro tovar ayirboshlashning taxminan 70 foizi meva-sabzavot va oziq-ovqat mahsulotlariga to‘g‘ri keladi", - dedi vazir Rana Tanvir Husayn.

O‘zaro aloqalarni yangi bosqichga olib chiqish, mavjud salohiyatni to‘liq ishga solish uchun O‘zbekiston bilan hamkorlikning istiqbolli yo‘nalishlariga to‘xtalib o‘tildi. Xususan, urug‘chilik va seleksiya, o‘simliklar himoyasi va karantini, ularni radiatsion usulda tozalash, yuqori mahsuldor chorva zotlarni yaratish, qishloq xo‘jaligi texnikasini birgalikda ishlab chiqarish ko‘rsatib o‘tildi.

Ikki davlat bozorlarida mahsulotlar sonini oshirish, xalqlar farovonligini yanada yaxshilash maqsadida o‘zaro meva-sabzavot va oziq-ovqat mahsulotlarini yetkazib berish jarayonini soddalashtirish, fitosanitariya ruxsatnomalarini rasmiylashtirish va bojxona jarayonlarini optimallashtirishning dolzarb masala ekanligi ta’kidlandi.

Qishloq xo‘jaligi yo‘nalishidagi hamkorlikni tizimlashtirish va ko‘rib chiqilgan tashabbuslarni amalga oshirish maqsadida keng qamrovli "yo‘l xaritasi"ni ishlab chiqish, agrar texnikalar bo‘yicha sanoat kooperatsiyasini yo‘lga qo‘yish, sohaviy qo‘shma ishchi guruhni tashkil etishga kelishib olindi.