Davlat organlarida chet tili darslari yo‘lga qo‘yiladi. Til bilgan xodimlarga ustama to‘lanadi

O‘zbekistonda chet tillarini o‘rganishni ommalashtirish bo‘yicha prezident qarori qabul qilindi.

Qaror bilan, davlat xizmatchilarining xorijiy tillarni o‘zlashtirishi darajasini oshirish maqsadida:

• 2021 yil 1 iyuldan boshlab, davlat organlarida ta’lim tashkilotlari o‘qituvchilarini shartnoma asosida jalb qilib,  haftada kamida bir marta xodimlarni xorijiy tilga o‘qitish amaliyoti yo‘lga qo‘yiladi.
• 2022 yil 1 yanvardan boshlab, xorijiy tillardan milliy
  va xalqaro sertifikatga ega davlat boshqaruv idoralarining barcha bo‘g‘inlari xodimlariga lavozim maoshiga nisbatan 20 foizgacha qo‘shimcha ustama to‘lanadi (tashkilotlarning budjetdan tashqari hamda ish haqi fondi doirasida budjet mablag‘lari hisobidan).
• 2022 yildan boshlab, davlat organlariga ishga qabul qilish
  va yuqori lavozimga tayinlash uchun xorijiy tilni bilish talabgorga qo‘yiladigan majburiy malakaviy ko‘nikma sifatida belgilanadi.
• Davlat organlarining rahbarlari o‘rinbosarlaridan biriga xorijiy tillarni o‘rganishni ommalashtirish, shu jumladan Xorijiy tillarni o‘rganishni ommalashtirish agentligi bilan hamkorlik qilish vazifalari yuklatiladi.

Bandlik va mehnat munosabatlari vazirligi Davlat xizmatini rivojlantirish agentligi, Xorijiy tillarni o‘rganishni ommalashtirish agentligi, Adliya vazirligi va Moliya vazirligi bilan birgalikda bir oy muddatda davlat organlarida xorijiy tillarni o‘rganishni ommalashtirish bo‘yicha qaror loyihasini kiritishi lozim.