Инсон ҳаётида иккита энг муҳим кун мавжуд. Биринчиси, у туғилган кун, иккинчиси эса нима учун дунёга келганини англаган кун. Ана шундай ўйлар билан ишдан қайтарканман, анчадан буён жияним билан суҳбатлашмаганим ёдимга тушди. Олийгоҳда ўқиш учун тайёргарлик кўраётган абитуриент жияним билан суҳбатлашиш менга 10 йил аввалги давримни эсга туширади. Шундай ўйлар билан унга дўкондан ширинлик сотиб олишга ошиқдим. Бироқ... кўзим ноодатий ҳолатга тушди.
Youtube'да кўриш
Mover.uz'да кўриш
Кўринишидан сипогина кийинган болакай дўкон атрофига тўхтаган машиналарга яқинлашиб, уловнинг баллонларини қорайтириб беришни таклиф қилаётганди. Бироз ўнғайсизланиб, жараённи кузатиб турдим: бола ҳалол меҳнати орқали пул топишни мақсад қилгани маълум. Чунки, хизматини таклиф қилган киши бош чайқаб қўйса, индамай кейинги «мижоз»ни қидириб кетаверди. Миямда яшиндек битта савол чақнаб кетди: унга пул нега керак? Кўнглим бир нимани сезгандек, болакайнинг олдига бордим.
«Исмим Султонбек, ёшим 12да. Бу ерда ишлаб топган пулларимни уйга олиб бораман. Шу орқали рўзғорга ёрдам қиламан, кундузи мактабда таҳсил оламан. Ҳозир 5-синф ўқувчисиман», деб ўзини таништирди кичик суҳбатдошим.
Султонбекнинг айтишича, оиладаги моддий шароит, синглисининг кетма-кет касал бўлиб, шифохонада даволаниши, опасининг хасталиги 12 ёшли болани отасиз беш болани тарбия қилаётган онасига кўмак беришга ундаган.
«Баъзида ишим юришмайди, ҳеч ким баллонини қорайтиргиси ҳам келмай қолади. Шу кунларда уйга қуруқ кираман. Лекин ойим индамайди», деб қўшимча қилди у.
Султонбекнинг сўзларини тинглаб, аввалига ишонқирамай, сўзларига шубҳа қилдим. Аммо, севимли адибнинг асаридаги ёш қаҳрамон каби мағрур турган болани ким тарбия қилаётгани, у қаерда ва қай шароитда яшашига қизиқдим. Бир амаллаб, болани кўндирдим: биз бирга уйга қайтдик.
Маълум бўлишича, Султонбекнинг онаси - Гулчеҳра опа беш бола билан қурилиши тугалланмаган ҳовлида вақтинча ижарага яшаб турибди. Оиланинг энг тўнғич фарзанди, Султонбекнинг опаси 13 ёшда, қолганлар ҳам ҳали вояга етмаган болалар.
«Турмушимда хиёнатга учрадим, болаларнинг отаси бошқа аёлга уйланиб, бизни ташлаб кетди. Боргани жойим, тунагани уйимиз йўқ эди. Кўчада нон сотдим, сигир соғдим, кимларнингдир юмушини бажариб, шуларнинг қорнини ўйладим. Сўнгги икки йилда ҳаёт тарзимиз шундай саргузаштларга тўлиб кетдики, баъзан жонимга қасд қилишни ҳам ўйлаб қолардим. Тавба қилдим, кейин ортимдан қоладиган норасидаларимни ўйлаб қоламан», дейди она.
Ҳақиқатан, Гулчеҳра опа жуда кўп қийинчиликни кўргани сўзларидан, кўзларидан маълум. Ундан шу пайтгача нега моддий ёрдам сўраб, ҳокимият вакиллари ёки қариндошларига мурожаат қилмаганини сўрадим.
«Эй, ҳозир мендан бадтар аҳволда бўлган оилаларга ҳам ёрдам беришмаяптику? Асли ўзига тўқ оилада ўсганман, лекин қизлик уйимга беш болам билан сиғармидим? Барчанинг ташвиши ўзига етарли. Зангиота тумани ҳокимлигидан 2 сотих ер сўраб мурожаат қилгандим, амаллаб девор қилиб оларман, деган хаёлда... Лекин, энди ҳеч кимдан нажот кутмай қолдим. Шу болаларим тезроқ оёққа турса, балки ёнимга кириб, оғиримни енгил қилар», деб маъюс жилмайиб қўйди она.
Энди барчасини тушундим. Султонбек ҳаётидаги энг муҳим икки кунни кўрди: у ёруғ дунёга зиммасида қандай юк билан келганини англабди. Бола ҳали ёш, лекин олам-олам умид ва истаклар билан катталардек фикр билдиради.
Шу тоб ўйланиб, қолдим. Балки Зангиота туман ҳокимлиги шу оилага эътибор қилиб, икки сотихгина ер ажратиш масаласини ростан ўйлаб чиқар? Балки саховатпеша ва сахий юртдошларимиз кўмагида оиланинг ҳаётига катта қувонч олиб кирувчи ўзгаришларга сабабчи бўлиб қолармиз. Ким билсин, мана шу қийинчилик ва ҳаётнинг муштларини эрта кўрган болакай халққа нафи тегадиган етук инсон бўлар...
Хайрия қилмоқчи бўлганлар учун:
Гулчеҳра Насриддинова
Агро банк (Click, PayMe) 8600 0417 8152 4633
Тел: +99899 813 52 74
Агробанк АТБ Тошкент шаҳар филиали
МФО: 00394
ИНН: 201 200 124
Нақд пул топширганда: 2311 6000 6000 0039 4001
Мижоз аризасига асосан картадан картага пул ўтказилганда: 2311 8000 4000 0039 4001
Бошқа ташкилотлардан келиб тушган маблағлар транзити: 2312 0000 9000 0039 4001
