O‘zbekistonda xususiy pensiya jamg‘armalari tashkil etiladi

O‘zbekistonda xususiy pensiya jamg‘armalarining paydo bo‘lishi uchun qonunchilik bazasini shakllantirish rejalashtirilmoqda. Bu haqda Kapital bozorini rivojlantirish agentligi direktori Otabek Nazirov xabar berdi.

Uning so‘zlariga ko‘ra, 7 oktabr kuni prezident bilan yig‘ilishda pensiya islohoti masalasi ko‘tarilgan, uning doirasida kelgusi yil oxiriga qadar O‘zbekistonda xususiy pensiya jamg‘armalari paydo bo‘lishi mumkin. 

«Biz Moliya vazirligi bilan yaqindan ishlaymiz. O‘ylashimcha, kelgusi yil oxiriga qadar jiddiy o‘zgarishlar va fundamental qonun loyihalarining dastlabki variantlari paydo bo‘ladi», - dedi Nazirov Kun.uz muxbiriga.

Uning ta'kidlashicha, butun dunyoda pensiya jamg‘armalari aholi jamg‘armalarini shakllantirishning asosiy omili hisoblanadi.

«Bizda bunday amaliyot hali mavjud emas va prezident jahondagi eng yaxshi tajribani o‘rganish hamda O‘zbekistonda pensiya islohotining qanday modelini taklif qilishimiz mumkinligini ko‘rib chiqish bo‘yicha topshiriq berdi», - deya qo‘shimcha qilib o‘tdi agentlik rahbari.

«Bu boshqa mamlakatlarda qanday amalga oshiriladi? Kishi pensiya hisobvarag‘iga pullarini qo‘yganida, ular soliqqa tortilmaydi. Ya'ni, siz soliq bazangizni pasaytirmoqdasiz. Fuqaroda pul tejash uchun to‘g‘ridan-to‘g‘ri rag‘bat paydo bo‘ladi. Bu pullar keyinchalik qimmatli qog‘ozlarga fond bozori orqali kiritiladi», - dedi Nazirov.

Agentlik boshqarma boshlig‘i Tursun Mahkamovning so‘zlariga ko‘ra, O‘zbekistonda xususiy pensiya jamg‘armalari paydo bo‘lsa, aholi o‘z jamg‘armalarini qayerda saqlashi va ular orqali pul ishlashi mumkinligini ham tanlashi mumkin bo‘ladi.

«Bu ixtiyoriy bo‘ladi va siz kelajakda pullaringiz qay tarzda qaytarilishini bilib turasiz, omonatlaringiz qanchalik o‘sayotganini kuzatishingiz yoki ularni boshqa pensiya jamg‘armasiga o‘tkazishingiz mumkin bo‘ladi. Agar hozir davlat sizning keksaligingiz haqida o‘ylayotgan bo‘lsa, keyinchalik omonatlaringizni o‘zingiz boshqarish imkoniga ega bo‘lasiz», - deya ta'kidlab o‘tdi u.