Июнда енгил автомобиллар савдоси сезиларли даражада камайди

Иқтисодий тадқиқотлар ва ислоҳотлар маркази автомобил бозоридаги вазиятни таҳлил қилди. 

Июн ойидаги таҳлил натижаларига кўра, республика бўйича автотранспорт воситаларининг умумий савдоси 13,6 фоизга камайган ҳамда қарийб 87 минг донани ташкил этган. Йиллик ҳисобда эса бозор фаоллиги 1,4 бараварга қисқарган.

Марказга кўра, бу қисман мавсумий омилларга боғлиқ бўлиши мумкин, чунки ёзги мавсумда анъанавий равишда ишбилармонлик фаоллиги пасаяди.

Енгил автомобиллар

Июн ойида енгил автомобиллар савдоси 13,3 фоизга пасайиб, 77,6 минг донагача камайган. Ҳудудий кесимда энг катта пасайиш Сурхондарё va Андижон вилоятларида, шунингдек, Қорақалпоғистон Республикасида қайд этилган – ўртача 22 фоиз.

Шу билан бирга, баъзи ҳудудларда сотувлар ошгани кузатилган. Хусусан, дастлабки 6 ойда Хоразм va Навоий вилоятларида ўтган йилнинг мос даврига нисбатан ўртача 7 фоизлик ижобий динамика қайд этилган. 

2024 йилнинг биринчи ярми якунларига бўйича Ўзбекистонда енгил автомобиллар савдоси 580 минг донани ташкил этди, бу эса ўтган йилнинг шу давридаги кўрсаткичга нисбатан 19 фоизга пастдир. Бу нафақат олдин эксплуатацияда бўлган автомобилларга талабнинг пасайиши билан, балки автомобилларни рўйхатдан ўтказиш жараёнларининг мураккаблашиши ҳамда расмийлаштириш va қайта рўйхатдан ўтказиш қийматининг ошиши билан ҳам изоҳланади.

“Шундай қилиб, сотувлар умумий ҳажмининг 97,3 фоизи тўғри келувчи енгил автомобилларнинг иккиламчи бозорида талабларнинг қаттиқлашиши вa рўйхатдан ўтказиш тартибларининг қимматлашиши олди-сотди битимлари сонининг қисқаришига таъсир қилди, бу эса, ўз навбатида, автомобил бозорида умумий савдо кўрсаткичларига акс таъсир қилган бўлиши мумкин”, дейилади ИТИМ шарҳида.

Бирламчи бозордаги вазият 

Июн ойида енгил автомобилларнинг бирламчи бозорида савдолар ўтган ойга нисбатан 9 фоизга камайган ҳамда умумий ҳисобда 26 минг донани ташкил этган. Йиллик ҳисобда эса фаолликнинг кичикроқ – 5,3 фоизга пасайиши қайд этилган. 

Янги енгил автомобилларнинг бирламчи бозори иккиламчи бозорга нисбатан анча барқарор динамикани намойиш этяпти.

Июн ойида маҳаллий ишлаб чиқарилган янги автомобиллар сотувининг қисқариш тенденцияси давом этган. Хусусан, бундай автомобиллар сотувлари май ойига нисбатан қарийб 10 фоизга пасайган. Ушбу тенденция маҳаллий ишлаб чиқарилган янги автомобиллар савдосининг май ойида бошланган ўсишига барҳам берди. 

Хорижий енгил автомобиллар бозори ҳам турғунлик белгиларини намоён этмоқда. Июн ойида ушбу сегментдаги сотувлар 0,4 фоизга ўсган вa 2,4 минг донани ташкил этган. Фаолликнинг нисбатан кичик ўсиши йиллик ҳисобда сотувларнинг сезиларли пасайишини қопламаган. Бу кўрсаткич ўтган йилга нисбатан қарийб 34 фоизни ташкил этади.

Енгил автомобиллар иккиламчи бозори

Енгил автомобиллар иккиламчи бозоридаги вазият сотувлар динамикасининг пасайиши билан тавсифланади.

Хусусан, июн ойида енгил автомобилларнинг иккиламчи бозоридаги фаоллик ўтган ойга нисбатан 15,3 фоизга пасайган Ҳисобот даврида ушбу сегментда 51,5 минг дона атрофида автомобил сотилган. Умуман олганда, сотувлар йиллик ҳисобда 1,6 баравардан кўпга қисқарган.

Электромобиллар бозори

Июнда енгил электромобиллар сегменти ҳам сотувларнинг пасайишини намоён этган. Сотувлар ҳажми 3 минг донани ташкил этиб, май ойига нисбатан 800 дан ортиққа камайган.

Шунга қарамасдан, электромобиллар савдоси ўтган йилнинг июн ойи даражасига нисбатан 1,3 бараварга ошган.

Ўзбекистонда электромобиллар бирламчи бозорида сотувлар бир ой ичида сезиларли даражада — 28 фоизга қисқарган бўлса, иккиламчи бозорда бунинг акс тенденцияси кузатилган.

Бу сегментда март ойидан буён фаолликнинг ўсиши қайд этилмоқда. Июн ойидаги ўсиш 2,4 фоиз бўлган.