Бош прокуратура ҳузуридаги Департамент хабарига кўра, ҳолатлар Ғаллаорол ва Мирзачўл туман бўлимлари ҳамда бошқа ҳуқуқни муҳофаза қилувчи органлар ҳамкорлигида ўтказилган алоҳида тезкор тадбирларда аниқланган.
Биринчи ҳолатда «Жиззах сув таъминоти» АЖ Жиззах шаҳар филиали инспектори Ў.А. фуқаро У.С.нинг қурилиши тугалланмаган биносида сувдан ноқонуний фойдаланилгани юзасидан далолатнома расмийлаштирмасликни ваъда қилган.
Департамент маълумотига кўра, инспектор бунинг эвазига 2 млн сўм олган вақтида ашёвий далиллар билан ушланган. Тезкор тадбирни Департаментнинг Ғаллаорол тумани бўлими ҳамкор идоралар билан ўтказган.
Иккинчи ҳолат Мирзачўл туманида қайд этилган. «Жиззах сув таъминоти» АЖнинг туман филиали муҳандиси А.Х. фуқаро А.Э.нинг ичимлик сувидан ноқонуний фойдалангани бўйича далолатнома расмийлаштирмаслик ва жарима ёзмаслик эвазига пул олганликда гумон қилинмоқда.
У 2,2 млн сўмни олган вақтида ашёвий далиллар билан ушлангани билдирилган.
Ҳар икки ҳолат юзасидан Жиноят кодексининг тегишли моддалари билан жиноят ишлари қўзғатилган. Ҳозирда тергов ҳаракатлари олиб борилмоқда.
