Кейт Миддлтон ўзини янги ишда синаб кўрмоқчи

Кембриж герцогиняси Кэтрин  The Huffington Post UK онлайн нашриётида меҳмон муҳаррир сифатида фаолият юритади, дея хабар бермоқда Reuters.

Шаҳзода Уильямнинг рафиқаси февраль ойининг ўртасида бир кунлик навбатчиликда бўлади. У вақтинчалик ҳамкасбларини Кенсингтон саройига таклиф этади.

Кэтрин бу йўл билан болаларнинг руҳий саломатлиги масаласига эътибор қаратиш истагида. Хусусан герцогиня ўқитувчилар, ота-оналар, тадқиқотчилар ва экспертларнинг мазкур соҳада олиб бораётган иши тўғрисида гапириб беради. Кенсингтон саройи берган маълумотда герцогиня сўнгги йилларда бу соҳадаги фаолиятини ўз ишининг “муҳим томони”га айлантиргани айтилган.

The Huffington Post UK нашридагилар герцогиня билан ҳамкорлик қилишга тайёр эканликларини билдиришган.

Қайд этиш керакки, Кэтрин ўз оиласининг журналистика билан шуғулланган илк вакили эмас. Унинг синглиси Пиппа Миддлтон Vanity Fair журнали учун ҳам мақолалар ёзган.

Аввалроқ шаҳзода Уильям Хартфордширдаги мактаб ошхонасида тушлик қилгани ҳақида хабар берилган эди.