Фёдор Емельяненко укаси Александрни "сотқин" деб атади

Россиялик яккакураш жангчиси Фёдор Емельяненко ўзининг укаси Александр Емельяненкога очиқ мактуб йўллади. Аввалроқ Александр акаси атрофини унга "лаганбардорлик" қилувчилар ўраб олгани ҳақида танқидий сўзлар билдирганди.

Фёдорнинг мактубда ёзишича, у укасининг ёлғонига муносабат билдиришни ўзига муносиб кўрмайди.

"Сенга бу очиқ мурожаатни қилишимга келсак, бунга асосий сабаб шуки, сен менинг яқинларимни лаганбардорлар деб атадинг. Лаганбардор – бу сенсан, сотқин", деб мурожаат қилган укасига Фёдор.

Фёдор, шунингдек, Александрни қийин дақиқаларда қўллаб-қувватлаган ва у билан ёнма-ён турган одамлар азият чекаётганидан афсусдалигини, укаси эса сариқ чақага ҳам арзимаслигини айтган. 

"Мен шахсан ўзим сен деб ўнлаб одамлардан узр сўраганман. Менинг номимга нима десанг деявер, бунга чидайман, бироқ яқинларимни ҳақорат қилма", деб айтган Фёдор.

23 октябрда Александр акаси билан 10 йилдан бери "сен-менга" бориб қолгани ҳақида сўзлаб берган. У бошқа жангчи Александр Харитонов билан низога борганда акаси уни қўллаб-қувватлашдан бош тортгани ва унинг атрофидагилар унга лаганбардорлик қилишлари ҳақида сўзлаб ўтган.

"Федя ҳақида шуни айтишим мумкинки, унинг ўз ҳаёти, менинг ўз ҳаётим бор. Биз у билан 10 йилдан бери гаплашмаймиз. У мен билан гаплашишни истамайди, мен эса унга суқилишни истамайман", деб айтганди Александр ўшанда.

Унинг айтишича, Харитонов билан низода акаси уни қўллаб-қувватламаган. "Бу менга ёқимсиз бўлган. Мен ҳар доим акамни ёнини олиб келганман, у учун низоларга борганман. Бироқ кўринишича, бу унга қизиқ бўлмай қолган", деб айтган Александр акаси ҳақида. У акасининг дўстларини ҳам "эслаб ўтган": "Ҳеч ким фойдали алоқаларни йўқотиш хавотирида унинг юзига ростини айтмайди. Унинг атрофида лаганбардорлар йиғилиб олган". 

Александр Емельяненко уйида хизматкорлик қилган аёлни зўрлагани учун 2015 йилда 4,5 йилга озодликдан маҳрум этилганди. У 2016 йил ноябрида жазонинг қолган муддатини ахлоқ-тузатиш ишлари билан ўташ шарти билан муддатдан аввал озод этилган. 

У 2017 йил 27 сентябрда яна рингга кўтарилиб, бразилиялик Жеронимо Дос Сантос устидан ғалаба қозонди.