АҚШдаги оралиқ сайловлар
АҚШда 3 ноябр куни бўладиган оралиқ сайловларга бир кун қолди. Сайловда Вакиллар палатасининг барча 435 ўрни ва Сенатнинг 35 ўрни учун овоз берилади. Бундан ташқари, қатор штатларда губернаторлар ҳам сайланади. Икки палатада кўпчиликни қўлга киритиш учун демократларга – Вакиллар палатасида 3 та, Сенатда 4 та ўринни қўшимча эгаллаш кифоя. Ҳозир Сенатда Трампнинг партиядошлари – республикачилар кўпчиликни ташкил этади.
Муддатидан олдин овоз бериш бу йил рекорд даража – ҳозиргача 48 миллиондан ортиқ америкалик овоз берган. Бироқ мутахассислар бу рақамлар сайловчилар кимга овоз берганини кўрсатмаслигини таъкидламоқда.
Сўровномалар демократлар фойдасига. New York Times ва Сиена университети сўровномасига кўра, ҳал қилувчи еттита Сенат пойгасидан бештасида демократлар олдинда, Аляска ва Айовада эса номзодлар тенг. Таҳлилчилар демократлар Вакиллар палатасида ғалаба қозонишига ишонч билдирмоқда, Сенат тақдири эса ҳали ноаниқ. Октябр ўрталаридаги Reuters/Ipsos сўровномасида АҚШ президенти Доналд Трамп фаолиятини маъқуллаганлар улуши 31 фоизга тушиб, рекорд даражада пасайганди.
Трамп 1 ноябр куни Канзас штатининг Салина шаҳрида сўнгги сайловолди митингини ўтказди. Трамп сентябрда агар республикачилар Конгресснинг икки палатасини ҳам сақлаб қолса, ҳар бир вояга етган америкаликка 5 минг доллардан «Трамп дивиденди» тўлашни ваъда қилганди.
Олешкидаги сулҳ якунланди
Херсон вилоятидаги Олешки шаҳрида эълон қилинган олти кунлик маҳаллий сулҳ муддати 1 ноябр куни тугади. Сулҳ АҚШнинг биринчи хоними Мелания Трамп воситачилигида ва Рим папаси иштирокида келишилган. Дастлаб фақат Олешкини қамраган сулҳ кейинроқ бутун вилоятга кенгайтирилган. Бу 2022 йилда уруш бошланганидан бери энг узоқ маҳаллий тўхталиш бўлди.
Россия 2022 йил февралида эгаллаган Олешки бир томондан Днепр, иккинчи томондан Россия қўшинлари билан ўралиб қолганди. BBC’нинг ёзишича, аҳоли озиқ-овқат, сув ва электр танқислигидан азият чеккан. Кўпчилик омон қолиш учун томорқадаги ўтларни пишириб еган.
Сулҳ даврида аҳоли шаҳардан автобусларда олиб чиқилди. Украинага ўтмоқчи бўлганлар Қрим ва Россия жануби орқали Беларусга учиб, у ердан уйига қайтди. Якшанба куни эса Украина армияси вилоятнинг хавфли ҳудудларидан яна 167 кишини олиб чиқди. Жами 800 га яқин киши эвакуация қилинган.
