Қирғиз-ўзбек чегарасининг Унгартепа қисми ҳали делимитация қилинмаган — Қирғизистон ДЧХ

Қирғизистон Жўқорғи Кенеши депутати Умбетали Қодиралиев («Республика – Ата-Журт») Унгартепа тоғолди ерлари қирғиз-ўзбек давлат чегараларини делимитация ва демаркациядан ўтказиш жараёнига кирган ҳудудлар рўйхатида экани ёки унга кирмагани билан қизиққан. У бу ҳақда 21 ноябрь куни Халқаро ишлар, мудофаа ва хавфсизлик бўйича Қўмита йиғилишида савол берган.

Қирғизистон Давлат чегара хизмати раисининг ўринбосари Қубатбек Жээнбоевнинг таъкидлашича, бу масала бўйича ҳукуматнинг махсус комиссияси шуғулланмоқда. Унинг сўзларига кўра, қолган участкалар бўйича музокаралар давом этмоқда, тоғнинг делимитацияси билан боғлиқ масала ҳали ҳал этилмаган.

Аввалроқ қирғиз-ўзбек чегарасининг 85 фоизи мувофиқлаштириб олингани, яна 15 фоизи қолгани маълум қилинганди.