Олтин-валюта захиралари 1,1 миллиард долларга кўпайди - Президент

Давлатимиз раҳбари Шавкат Мирзиёев Олий Мажлис Сенати ва Қонунчилик палатаси аъзоларига 2017 йилда амалга оширилган асосий ишлар якуни ва Ўзбекистон Республикасини 2018 йилда ижтимоий-иқтисодий ривожлантиришнинг энг устувор йўналишларига бағишланган Мурожаатномасини тақдим этди. 

«Миллий валютамизни эркин конвертация қилишга киришдик. Юридик ва жисмоний шахслар хорижий валютани тижорат банкларидан чекловсиз сотиб олиш ва эркин сотиш имконига эга бўлди. Чет эл валютасининг олди-сотди операциялари ҳажми либерализация даврига нисбатан 1,5 баробар ошиб, ўртача 1,3 миллиард АҚШ долларини ташкил этди. Шу билан бирга, давлатимизнинг олтин-валюта захиралари 1,1 миллиард АҚШ долларига кўпайди», дея президент сўзларини келтирган ЎзА. 

Президентнинг маълумот беришича, жорий йилда Ўзбекистонда 12та эркин иқтисодий ва 45та саноат зонаси фаолияти йўлга қўйилди ва бу ҳудудларни жадал ривожлантириш имконини бермоқда. Яқин вақт ичида яна 50 та янги саноат зонасини ташкил этиш бўйича иш олиб борилмоқда.