Доналд Трамп ва Володимир Зеленский 22 сентябр куни Ню Йоркда БМТ Бош ассамблеяси доирасида ўзаро учрашув ўтказди. Президентлар учрашуви 40 дақиқага яқин вақт давом этди, улар Россия билан музокаралар истиқболлари, Украинага ҳарбий ёрдам ҳамда Киев ва Москва ўртасида энергетик сулҳ тузиш эҳтимолини муҳокама қилишган.
Учрашувдан олдинроқ Трамп БМТ трибунасида туриб уруш тез орада тугашини мўлжаллаётганини айтганди: «Биз Россия ва Украина раҳбарлари билан жуда яқиндан ишлаяпмиз ва бу ишни охирига етказамиз. Ўйлайманки, бу одамлар кутганидан тезроқ содир бўлади».
Зеленский эса музокаралардан кейин уруш қачон якунланиши ҳақида гап очди:
Умид қиламанки, биз бу урушни якунлаймиз, умид қиламанки, президент Трамп уни якунлашга ёрдам беради. Менимча, буни имкон қадар тезроқ – қишгача, яхшиси қишгача қилишимиз керак.
Европадагилар ҳам шунга умид қилишмоқда. «Одамлар қишгача қисман оташкесим бўлишидан умид қилишмоқда», – деди Финландия президенти Александр Стубб Bloomberg учун интервюсида.
Икки ҳафта олдин Зеленский уруш қишда ҳам давом этишини тахмин қилаётганди. «Ҳозирча шундай кўринмоқда», – деганди у 6 сентябр куни Киевда ўтказилган музокараларда Трампнинг махсус вакиллари Стив Уиткофф ва Жаред Кушнерга.
Ню Йоркдаги учрашувдан сўнг Украина раҳбари The Wall Street Journal нашрига берган интервюсида Трамп энди Москва билан энергетика сулҳи бўйича музокаралар олиб боришга ҳаракат қилишини айтди. Шу билан бирга, у Владимир Путин бундай сулҳга рози бўлиши учун Вашингтон санкцияларни кучайтириш орқали қўшимча босим қилиши талаб этилишини таъкидлаган. Зеленский Украина ҳар қандай форматдаги сулҳга розилигини айтиб, Путин ва Трамп иштирокидаги уч томонлама учрашувга ҳам тайёрлигини қўшимча қилган.
Музокараларнинг яна бир мавзуси – ҳарбий ёрдамнинг «қишки пакети» бўлган. Зеленский Трампдан Украинага Америка захираларидан Patriot ракеталарини беришни сўраган. Бунинг эвазига Киев Германия билан келишув доирасида келажакда етказиб бериладиган ракеталарнинг бир қисмини АҚШга қайтаришни таклиф қилмоқда. Трамп розилик бермаган, аммо Зеленский бу ғоя дарҳол рад этилмаганини «яхши қадам» деб атади.
Кремлдагилар гарчи Путин Трамп билан учрашишга тайёр бўлса-да, ҳозирда тинчлик музокаралари учун ҳеч қандай асос йўқлигини таъкидламоқда. РФ президенти матбуот котиби Дмитрий Песков экспертлар даражасидаги дастлабки ишларсиз Зеленский билан учрашув ўтказишни вақтни беҳуда сарфлаш деб атади ва бундай учрашув фақат Москвада бўлиб ўтиши мумкинлигини яна бир бор таъкидлади.
