Англияда финал, Испанияда дерби. Ҳафтанинг энг муҳим учрашувлари
|22:23 / 24.02.201817 63812 мин
Ҳар доимгидек уик-эндда Европада бир чемпионат ва кубок баҳсларидаги бир қатор муҳим учрашувлар бўлиб ўтади. Tribuna.Uz анъанавий равишда бўлажак ўйинларга батафсил тўхталади.
Каталониянинг «Жирона» клуби мавсумнинг кашфиёти бўлди, деб бемалол айтиш мумкин. Жироналиклар «Атлетико» билан икки марта дуранг ўйнашди, «Реал» мағлуб этилди. Жамоа ўз майдонидаги сўнгги 4 учрашувнинг барчасида ғалаба қозониб, бирор марта гол ўтказиб юбормади – 12-0. Натижада «Жирона» хавфли зонадан 16 очко илгарилаб кетган ҳолда, кучли саккизликдан жой олиб турибди.
Биринчи даврада ўтган учрашувда Вальверде шогирдлари йирик ҳисобда ғалаба қозонишган бўлса-да, бу сафарги ўйин осон бўлмаслиги тайин. Зеро «Барселона» сўнгги ўйинларда гол уришда қийинчиликларга дуч келмоқда. Месси ва шериклари сўнгги 7 ўйинда атиги 10 гол уришганини таъкидлаш жоиз. Бунинг устига, «Барселона» ҳафта ўртасида «Челси»га қарши осон кечмаган ўйинда майдонга тушди, бу жиҳатдан кўпроқ дам олган «Жирона»да қўшимча устунлик юзага келиши мумкин.
Мавсум бошидан буён «Барселона»нинг фақат «Реал» билан очко фарқи ҳисобланиб, Испанияда ҳаммаси ҳал бўлгандек туюлган бўлса-да, сўнгги паллага келиб, «Атлетико» пайдо бўлди ва ҳозирда биринчи ва иккинчи ўринларни атиги 7 очко ажратиб турибди холос. Баҳорда «Атлетико» Чемпионлар Лигасида ўйнамаслигини ҳам эътиборга олсак, «Барселона»нинг хато қилишга ҳаққи йўқ.
КРИСТАЛ ПЭЛАС - ТОТТЕНҲЭМ (25 февраль, 17:00)
«Тоттенҳэм»нинг биринчи даврадаги энг қийин ғалабаларидан бири айнан мана шу дербига тўғри келганди. Ўшанда «Кристал Пэлас» ҳар бир кўрсаткич бўйича мезбонлардан қолишмаган, фақат иккинчи бўлиб ўрталарида Сон Ҳёнг Миннинг голи «Тоттенҳэм»га ғалаба олиб келганди.
Почеттино жамоаси жуда яхши формага кириб олди, қаторасига 14 ўйиндан бери мағлубиятга учрамаяпти. Айниқса, «Ливерпуль», «Манчестер Юнайтед», «Ювентус» ва «Арсенал»га қарши ўтказилган ўйинлар ҳам «Тоттенҳэм» учун мақбул ҳисобларда якунлангани таҳсинга сазовор. Лекин енгил тин олишга ҳали эрта, «Кристал Пэлас» ўз майдонида ҳар қандай рақибга қаршилик қилишга қодир. Ушбу стадионда «Челси»нинг мағлубиятга учраганини, «Манчестер Сити»нинг зўрға мағлубиятдан қутулиб қолганини эсласак, бу ўйин жуда қизғин кечишини олдиндан айта оламиз.
Мавзуга оид
«Тоттенҳэм» ниҳоят кучли тўртликка яқинлашиб олди, «Кристал Пэлас»ни эса, хавфли зонадан атиги 1 очко ажратиб турибди холос. Яъни, турнир эътибори билан ҳам ҳар икки жамоага ғалаба сув ва ҳаводек зарур.
МАНЧЕСТЕР ЮНАЙТЕД - ЧЕЛСИ (25 февраль, 19:05)
Январнинг бошида бу икки жамоа мураббийлари ўртасида даҳанаки жанглар бўлиб ўтганди. Ўша пайтда кутилаётган бу ўйин мана шу муносабатларнинг энг авж палласи бўлиши таҳмин қилинганди. Аммо ҳозир кескинлик у даражада эмаслигини айтиш керак.
Сабаби, Жозе Моуриньо энди ички фронтда кураш бошлаб юборди – Пол Погба ва бошқа баъзи футболчилар билан муносабатларни йўлга қўйиш керак. Контега ҳам бир гап ортиқча, ҳафта ўртасида «Барселона» устидан қозонилаётган муҳим ғалабанинг бой берилиши жамоага салбий таъсир қилган бўлиши турган гап.
Шундай бўлса-да, Премьер-Лиганинг классик ўйинларидан бири, ҳар икки жамоа ҳам кучли тўртлик йўлида кескин кураш олиб бормоқда. Бу ўйиндаги ғалаба мана шу йўлдаги жуда муҳим қадам бўлиши аниқ. Апрелда «Олд Траффорд»да ўтган ўйинда «МЮ» ҳар жабҳада рақибини енгиб, 2:0 ҳисобида устун келган бўлса, бу мавсумдаги илк ўйин «Челси»нинг катта устунлигида ўтган ва Моратанинг ягона голи ўйин тақдирини ҳал қилганди.
Мавсум бошида Моуриньо 3 ҳимоячи билан тўп сурадиган жамоаларга қарши 3-4-3 ни синаб кўрган ва қайсидир маънода муваффақият келтирганди. «Челси» ҳам шу услубда тўп суришини эътиборга олсак, португалиялик мутахассис яна 3-4-3 га мурожаат қилишини кутса бўлади.
Жароҳатларга келсак, «Челси» таркибида Давид Луиз ҳали ҳам таркибга қайтмади, Баркли ва Бакойоконинг ҳам ҳолати номаълумлигича қолмоқда. Мезбонларда эса, Андер Эрреранинг Севильядаги жароҳати жиддий бўлиб чиқди. Қайтганлардан эса, Эрик Байини алоҳида айтиш мумкин, шунингдек, Златан Ибраҳимович ўтган ҳафтадан бошлаб умумий гуруҳда шуғуланмоқда.
БАЙЕР - ШАЛЬКЕ 04 (25 февраль, 19:30)
Ливеркузенликлар охирги олти ўйиннинг бештасида ғалаба қозонишди ва 38 очко билан турнир жадвалида 4-ўринга кўтарилиб олишди. «Шальке» ҳисобида эса, 37 очко бор ва жамоа олтинчи ўринда бормоқда.
Бундеслига ҳам шу маънода АПЛни эслатиб юборяпти – биратўла 5 жамоа Чемпионлар Лигаси йўлланмасини берадиган уч ўрин учун аёвсиз курашга киришган. Бу ўйинни мана шу номзодлар ўртасидаги ўзаро тўқнашув сифатида баҳолаш мумкин.
Жамоаларнинг биринчи даврадаги ўйинида 1:1 ҳисобида дуранг қайд этилган. Ливеркузендаги сўнгги ўйинда эса, меҳмонлар йирик – 4:1 ҳисобида устун келишганди.
АРСЕНАЛ - МАНЧЕСТЕР СИТИ (25 февраль, 21:30)
Пеп Гвардиоланинг Манчестерга келганига бир ярим йилдан ошди. Бу давр мобайнида у трансферлар учун беш юз миллиондан кўп пул сарфлади, жуда кўп ўйинчиларни сотиб юборди, жамоа ўйинини янги босқичга кўтарди ва «Манчестер Сити» катта фарқ билан Англияда етакчилик қилмоқда.
Эртага бўлиб ўтадиган бу учрашувнинг аҳамияти нимада? Клублар учун иккинчи даражали ҳисобланадиган Лига кубогининг финали, аммо айнан шу ўйинда Гвардиола Англиядаги илк совринини ютиши мумкин. Балки испаниялик мураббийнинг кейинчалик ютадиган жуда кўп йирик совринларининг дебочаси бўлар, кўрамиз.
Рақиб ҳам анойи эмас. «Арсенал» сўнгги йилларда кубок ўйинларида Англиянинг энг муваффақиятли жамоаси саналади. Англия кубогининг сўнгги 4 мавсумининг учтасида Венгер жамоаси ғолиб чиққанини айтиш кифоя. Ўтган мавсумда «Арсенал» ярим финалда айнан «Манчестер Сити»дан устун келганини ҳам таъкидлаш жоиз.
«Манчестер Сити» мавсум бошидаги барқарорликни намойиш эта олмаяпти. Балки бу ҳал қилувчи палла олдидан енгил тин олишдир, билмадик, аммо факт шуки, Гвардиола жамоаси Англиядаги сўнгги тўрт сафар ўйинида ғалаба қозона олмаяпти. «Кристал Пэлас» ва «Бёрнли»да дуранг, «Ливерпуль»да мағлубият. Айниқса, Англия кубогида «Уиган»дан учралган мағлубият аламли бўлди. «Манчестер Сити»нинг ўзи иштирок этаётган барча мусобақаларда ғолиб чиқиш орзуси чилпарчин бўлди. Аммо Лига кубоги ҳам требл қайд этиш учун яхши имконият.
«Арсенал» Европа Лигаси 1/16 финалида деярли иккинчи таркибни туширди ва мана шу ўйинга жиддий тайёргарлик кўрмоқда. Манчестерликлар учун ҳам бу соврин муҳимлик даражасига чиққан – юқорида айтилганидек, Пеп учун бу биринчи соврин бўлиши мумкин.
Қизиғи, бу жамоаларнинг чемпионат учрашуви ҳам айнан шу турга белгиланганди. Лига кубоги муносабати билан қолдирилди. Орадан уч кун ўтиб, 1 март куни худди тўқнашувга яна бир бор гувоҳ бўламиз.
РОМА - МИЛАН (25 февралдан 26 февралга ўтар кечаси, 00:45)
Ниҳоят Женнаро Гаттузо «Милан»нинг дардига даво топди шекилли, жамоа 2017 йилнинг 23 декабридан буён мағлубият нималигини билмай келмоқда. Бу даврда «Милан» 11 ўйинда майдонга тушди ва 8 тасида ғалаба қозонди. Барча мусобақалардаги сўнгги 4 ўйин ҳам «Милан»нинг ғалабаси билан якунланмоқда. Ҳали гапиришга эртадир, аммо бу муваффақиятли серия натижасида «Милан» деярли кучли олтиликка кириб олди ва Чемпионлар Лигаси ўрни билан уларни фақат 8 очко ажратиб турибди холос. Мавсум давомида чемпионликка асосий даъвогар деб келинган «Интер» билан орадаги фарқ атиги 6 очко бўлиб қолганининг ўзи ҳам фақат «Интер»нинг омадсизили эмас, албатта.
Бу юришни давом эттириш учун энди Римда зафар қучиш керак. Гўёки имконсиздек кўринади, аммо «Рома»нинг сўнгги турлардаги уй ўйинларига эътибор берсак, «Милан»да имконият ёмон эмас. «Рома» Римдаги сўнгги 4 ўйиннинг 3 тасини «Торино», «Сампдория» ва «Аталанта» каби ўртамиёналарга бой бериб қўйди.
Ҳар икки жамоа ҳам ҳафта ўртасида еврокубокларда иштирок этишди. «Милан» «Лудогорец»ни енгиб, нимчорак финалга чиққан бўлса, «Рома» ЕЧЛ чорак финалига чиқиш учун энди «Шахтёр»ни ўз майдонида ютиши керак бўлади.
Рақиблар ўртасидаги сўнгги 15 ўйиннинг 7 тасида «Рома»нинг қўли баланд келган, уч ўйинда «Милан» ғалаба қозонган. Биринчи даврада «Сан Сиро»да бўлиб ўтган ўйинда «Рома» 2:0 ҳисобида устун келганди.
Юқорида тилга олиб ўтилганидек, «Атлетико» ҳозирда «Барселона»дан атиги 7 очкога ортда бормоқда. Ла Лигада чемпионлик интригасини қайтариш учун мадридликлар нафақат Испаниянинг, балки Европанинг энг қийин стадионларидан бирида ғалаба қозониши керак бўлади.
Бу осон бўлмайди, «Севилья» бу йил ўз майдонида фақат бир марта, Андалусия дербисида мағлубиятга учради холос. Чемпионлар Лигасида «Манчестер Юнайтед»га қарши ўйинни, бу ўйинда фақат Де Хеанинг маҳоратигина инглизларни мағлубиятлан қутқариб қолганини ҳам ҳамма кўрди. Бир ой олдин эса, айнан «Севилья» «Атлетико»ни икки марта ютиб Қироллик кубогидан чиқариб юборганди. Хуллас, мавсумнинг иккинчи ярмига келиб, «Севилья» жуда яхши спорт формасига кириб олди ва рақибига муносиб қаршилик қилиши шубҳасиз.
Ўз навбатида «Атлетико»нинг натижалари ҳам ёмон эмас. «Атлетико» Ла Лигадаги сўнги 8 ўйиннинг 7 тасида ғалаба нашидасини сурди. Ўша юқорида айтилган «Севилья»дан учралган мағлубиятдан сўнг Симеоне шогирдлари қаторасига 6 ўйинни ғалаба билан якунлашди.
Жамоаларнинг биринчи даврадаги ўйинида мадридликлар 2:0 ҳисобида устун келгандилар.
