АҚШнинг Tesla электромобиллар ишлаб чиқарувчи компанияси ўз машиналарини ишлаб чиқаришда кўп миқдорда нуқсонларга йўл қўймоқда, шу сабабли компаниянинг Калифорниядаги бош корхонаси тайёр машиналар ва деталларнинг таъмирини уддалай олмаяпти. Бу ҳақда NBC телеканали хабар бермоқда.
Телеканал маълумотларига кўра, компаниянинг Фримонтдаги (Калифорния) заводида ишлаб чиқарилувчи деталларнинг 40 фоизи нуқсонга эга. Шу сабабли Tesla ўзининг Model 3 моделини ишлаб чиқариш ҳажмини режадагидан камайтирди.
Ўтган ёзда компания раҳбари Илон Маск ойига 20 мингта электромобил ишлаб чиқариш режасини маълум қилганди, бироқ ишлаб чиқаришдаги муаммолар компанияни ўз режасини ўзгартиришга мажбур қилди. Энди компания март охиригача Model 3’дан ҳафтасига 2,5 мингта, 2018 йил июни охиригача 5 мингтадан ишлаб чиқармоқчи.
Бироқ компаниянинг ўзида телеканалнинг нуқсонлар ҳақидаги хабари рад этилди. Компания вакилининг айтишича, мутахассислар ишлаб чиқариш жараёнини синчковлик билан кузатадилар.
