Тўйларни камхарж ўтказишда одамларни санъаткорларга тўланадиган ҳақ энг кўп қийнамоқда

“Ўзбекконцерт” давлат муассасасида Сенатнинг Ёшлар, маданият ва спорт масалалари қўмитаси ҳамда Тўй-ҳашамлар, оилавий тантаналар, маърака ва маросимлар, марҳумларнинг хотирасига бағишланган тадбирлар ўтказилишини тартибга солишга оид жамоатчилик фикрини ўрганиш бўйича Республика ишчи гуруҳи ҳамкорлигида “Тўй-ҳашамларда концерт-томоша хизматини кўрсатишни қонунчилик ва миллий қадриятлар асосида тартибга солиш муаммолари: амалиёт ва истиқболдаги вазифалар” мавзусида давра суҳбати ўтказилди. Бу ҳақда Ўзбекистон Республикаси Олий Мажлиси Сенати ахборот хизмати хабар берган.

Таъкидланишича, кейинги пайтларда оилавий тадбирларни ўтказишда шуҳратпарастлик, ўзини кўз-кўз қилиш, бошқаларнинг ижтимоий аҳволини инобатга олмаслик, исрофгарчилик, халқимизнинг урф-одатлари ва анъаналарини менсимаслик каби иллатларнинг олдини олиш масаласига катта эътибор қаратилмоқда.  

Айни пайтда Тўй-ҳашамлар, оилавий тантаналар, маърака ва маросимлар, марҳумларнинг хотирасига бағишланган тадбирлар ўтказилишини тартибга солишга оид жамоатчилик фикрини ўрганиш бўйича Республика ишчи гуруҳи томонидан жойларда халқнинг талаб ва истаклари ўрганилмоқда.

Республика ишчи гуруҳи ўрганишлари натижасига кўра, бугунги кунда оилавий маросимларни камхарж ўтказишда одамларни энг кўп қийнаётган масалалардан бири концерт-томоша ўтказишда санъаткорларга тўланадиган ҳақ экани ойдинлашмоқда, дейилади хабарда.

Биргина 2017 йилнинг ўзида республика бўйича 3 мингдан зиёд жисмоний шахсларга (819 нафар хонанда, 807 нафар овоз оператори, 460 нафар дижей, 355 нафар созанда, 344 нафар раққоса, 203 нафар бошловчи, 22 нафар сўз устаси ва 19 нафар маъмур) концерт-томоша фаолияти учун лицензиялар берилган.

Қонунчиликда концерт-томоша фаолияти билан шуғулланувчи жисмоний шахслар учун бир қатор имтиёзлар кўзда тутилган. Концерт-томоша фаолияти билан шуғулланиш учун давлат божи тўловчи жисмоний шахслар мазкур фаолият бўйича қатъий белгиланган солиқни тўлашдан озод этилган, улар якка тартибдаги тадбиркорлар учун назарда тутилган тартибда, энг кам иш ҳақининг бир баравари миқдорида суғурта бадалини тўлаши белгиланган.

Бироқ, яратилган имтиёзларга қарамасдан, тўй-ҳашамларни ўтказишда хизмат кўрсатувчи жисмоний шахслар (санъаткор, тасвирчи, сураткаш, безакчи, транспорт хизмати кўрсатувчилар ва ҳоказолар) томонидан қўйилаётган нархларнинг ҳаддан зиёд юқорилаб бораётгани аҳолининг жиддий эътирозига сабаб бўлмоқда. Бундан ташқари, айрим вилоятларнинг тўй ва тантаналарида раққосаларнинг рақсга тушиш, пул сочиш, пул қистириш ҳамда ёшлар онгига салбий таъсир кўрсатувчи бошқа одобсиз шоуларнинг намойиш этилиши, хизмат кўрсатувчи шахслар томонидан миллий урф-одатларимиз ва қадриятларимизга мос келмайдиган келин-куёв рақси, “севги тарихи” (“Love story”) саҳналарининг намойиши ва бошқа бачкана ҳолатларнинг кузатилиши одоб-ахлоқ қоидаларига ҳамда миллий менталитетга зид келмоқда.

Тўйхоналарда инсонлар саломатлигига ва руҳиятига салбий таъсир кўрсатувчи овоз кучайтиргич ускуналаридан кенг фойдаланилиши, фонограмманинг оммалашиши, санъаткор ва раққосалар кийиниш маданиятига риоя қилмаётгани, вояга етмаган ёш ижодий гуруҳларнинг хизмат кўрсатишга жалб этилиши, сўз усталарининг бачкана чиқишлари ҳам бу борадаги оғриқли масалалардан саналади.

Тадбирда оилавий тантаналарда санъаткор ва бошқа хизмат кўрсатувчи жисмоний шахслар томонидан ташкил этилаётган дастурларнинг миллий қадриятларимизга мос тарзда ўтказилишини ҳар томонлама тартибга солиш юзасидан тизимли маънавий-маърифий тарғибот ишларини олиб бориш бўйича фикр-мулоҳазалар билдирилди.

Эслатиб ўтамиз, аввалроқ уч вилоятда тўй-ҳашамлар бўйича йиғилишлар ўтказилгани хабар берилганди.